Ƀuôn Lò dưi mkŏ mjing mbĭt hŏng hdră mkŏ mjing krĭng lăn Phú Yên, êbeh 400 thŭn êlâo, ƀiădah mnơ̆ng kriê pioh knŏng mrâo mdih mơ̆ng thŭn 2023. Phung duh bi liê bruă hiu čhưn ênguê, boh nik mơ̆ng Hà Nội, wĭt tinei pŏk dŭm homestay. Lu boh sang hđăp dưi blei čiăng wĭt mkra jing anôk drông phung tuê hiu čhưn ênguê. Amai Nguyễn Thị Thu Lài, sa čô mnuih ƀuôn sang hlăm ƀuôn brei thâo, wăt kơ bi mlih ktang jing bruă hiu čhưn ênguê, ƀiădah hlei mă bruă trah mă kan ăt djă pioh bruă, hlei čiăng kơ bruă kơh akâo mă bruă ti dŭm homestay msĕ hŏng amai.

“Mơ̆ng hruê ngă bruă dlăng anei msĕ si sang tal 2. Pô ƀuh tuê lu hĭn êjai. Ăt kyua mâo dŭm homestay pŏk kơ hmei mâo bruă mă hơĭt, klei hdĭp mda hơĭt hĭn.”

 Ăt jing bruă hiu čhưn ênguê, ƀiădah phung tuê hriê ti ƀuôn Lò mâo dŭm klei ktuê dlăng dleh wơr kyua klei khăp jĕ giăm mơ̆ng mnuih ƀuôn sang tinei. Mnuih ƀuôn sang hlăm ƀuôn dưi blŭ tlao hŏng tuê hlăm jih mmông tlam čiăng yăl dliê kơ hƀuê ênuk ƀuôn, ya ngă ƀuôn mâo anăn jing Ƀuôn Lò leh anăn thâo kơ bruă trah mă kan. Phung tuê dôk gŭ sa tlam čiăng mâo phung amĭ, phung amai mtô mñăm ñuăl, leh anăn hriăm tŭk mkra djam kan amâo mâo ƀâo mngir, amâodah hriăm kơ hdră mnuih ƀuôn sang tinei mkra mjing djam êlah anak rai, sa mta xương rồng hlăm ƀuôn. Phạm Duy Tân, mơ̆ng Đồng Nai brei thâo, ñu khăp hĭn dưi hmư̆ ênah êa ksĭ wĭt mbĭt hŏng phung trah mă kan hdang. Truh mmăt, dưi nao mmuñ klei chòi, mmuñ ƀội, mơ̆ng phung thâo mbruă hlăm ƀuôn leh anăn boh tŭ djŏ wưng phung tuê dưi nao hgŭm hlăm dŭm knăm mơak knhuah gru mơ̆ng mnuih ƀuôn sang krĭng anei:

“Kâo srăng hriê tinei lu blư̆ hĭn. Mơ̆ng anak mnuih truh kơ ai êwa tinei kâo ƀuh jĕ giăm êdi. Wăl anôk êa ksĭ jăk siam êdi. Mâo dŭm krĭng êa ksĭ sa nah jing êa ksĭ msĭn sa nah jing êa yua leh anăn amâo mâo lĭ liê prăk mnei êa doh. Kâo ăt mâo wưng nao ti sang mnia leh anăn dlăng diñu pŭ kan, anăn jing klei kâo ka tuôm ƀuh ôh. Klei diñu čhĭ mnia, pŭ kan, bi blŭ tlao kâo ƀuh jăk êdi.”

Dŭm êtuh thŭn hŏng lu klei mlih hlăm hƀuê ênuk, êpul êya ƀuôn Lò ăt adôk djă pioh boh tŭ dhar kreh êa ksĭ, dôk hlăm klei hdĭp aguah tlam mơ̆ng grăp gŏ sang. Kyuanăn ƀuôn Lò ară anei dưi iêo jak lu phung tuê. Klei đĭ kyar bruă hiu čhưn ênguê êpul êya ba wĭt ai hdĭp mrâo kơ ƀuôn. Lưu Bá Được, ƀuôn Lò, ƀuôn hgŭm Hoà Hiệp amâo dưi mdăp ôh klei hơ̆k mơak ti anăp klei mlih mơ̆ng ƀuôn sang pô:

"Dưi lač ƀuôn Lò leh hruê mtaih êngiê 1/4, dlăng msĕ hŏng đưm êdi. Ƀiădah mơ̆ng hruê mâo bruă hiu čhưn ênguê êpul êya, leh anăn anak mnuih hlăm ƀuôn đĭ kyar hĭn, leh anăn dŭm anôk diñu wĭt duh bi liê ti ƀuôn Lò jing sa anôk hiu čhưn ênguê mâo kơhưm ti Phú Yên.

Čiăng amâo mâo bi rai wăl anôk mâo mơ̆ng đưm mơ̆ng ƀuôn, ƀuôn hgŭm Hòa Hiệp mâo hdră êlan djă pioh knhuah phŭn mơ̆ng alŭ wăl ktuê hang ksĭ ƀuôn Lò. Sa hdră êlan mđĭ kyar bruă hiu čhưn ênguê êpul êya ti ƀuôn Lò dưi hluê ngă, ƀrư̆ ƀrư̆ mkŏ mjing anôk anei jing anôk truh mrâo, mkŏ mjing klei găl kơ phung tuê dưi ktuê dlăng, mdei msăn leh anăn nao hgŭm hlăm dŭm mta bruă dhar kreh êpul êya mbĭt hŏng mnuih ƀuôn sang alŭ wăl. Hluê anăn, đru kriê pioh wăl anôk dhar kreh ƀuôn trah kan knhuah gru. Dương Văn Đông, k’iăng khua Bruă sang čư̆ êa ƀuôn hgŭm Hoà Hiệp, čar Dak Lak brei thâo:

Drei kñăm kơ bruă brei klei dưi rŭ mdơ̆ng, hâo hưn tă hdră kơ dŭm anôk čhĭ mnia ngă bruă hiu čhưn ênguê leh anăn mnuih ƀuôn sang trah mă kan hdĭp ti alŭ wăl anei thâo djă pioh knhuah phŭn mơ̆ng ƀuôn Lò. Tal 2 hmei srăng bi mguôp hŏng phung khua thŭn, phung thơ̆ng kơ bruă kơ dŭm knăm mơak msĕ si akâo kan hdang, bi lông waih mran, mmuñ Bả Trạo čiăng mtô leh anăn hưn dŭm klei hriăm mơ̆ng diñu, mkŏ wĭt dŭm hdră bhiăn anei čiăng kơ phung tuê dlăng”.

 Ƀuôn Lò hruê anei mơak mñai hŏng dŭm mta bruă hiu čhưn ênguê êpul êya, dưi krơ̆ng klei êđăp ênang, knhuah đưm. Mnuih ƀuôn sang êngao kơ hơ̆k mơak nao ti êa ksĭ lŏ ngă bruă hiu čhưn ênguê yang ƀuôn, mbĭt anăn đru kriê pioh leh anăn mđĭ lar dhar kreh knhuah gru hŏng dŭm ƀuôn bruă đưm, knăm mơak leh anăn knhuah hdĭp đưm. Mă dhar kreh jing tur knơ̆ng  đru kơ alŭ wăl ba dŭm knhuah dhar kreh jing boh kdrŭt mđi kyar bruă duh mkra ala ƀuôn, đru mđĭ klei hdĭp mnuih ƀuôn sang leh anăn bi lar dŭm boh tŭ dhar kreh anăn truh hŏng lu mnuih./.