VOV4.Êđê - Ti anôk mă bruă aguah hruê 23/4 hŏng ƀuôn prŏng Hồ Chí Minh kơ hdră gang mkhư̆ klei ruă Covid 19, K’iăng khua knŭk kna Vũ Đức Đam mtă kơ êpul djŏ tuôm mđĭ hdră hiu ksiêm dlăng hlăm wưng mdei ti anăp, ksiêm dlăng kjăp mnuih mŭt hlăm ala čar soh hdră bhiăn, ăt msĕ mơh bruă truă čhiăm guôm ƀô̆ ti anôk lu mnuih čiăng gang mkhư̆ klei đĭ lả mŏng klei ruă. Blŭ hrăm ti anôk bi kƀĭn, K’iăng khua knŭk kna Vũ Đức Đam lač snei, ƀuôn prŏng Hồ Chí Minh ksiêm dlăng leh kjăp klei ruă Covid 19 hŏng lu klei mĭn mrâo ba akŏ hlăm kluôm ala. Khă snăn, hlăm hruê kăm êgao, krĭng Châu Á đĭ 34% ênoh mnuih djŏ klei ruă Covid 19, dŭm ala čar hlăm krĭng dôk mđĭ klei răng, ƀuôn prŏng Hồ Chí Minh jing krĭng huĭ srăng bluh mâo klei ruă anei, kyua mnuih ƀuôn sang hriê ti krĭng anei lu, kyua anăn brei mđĭ kjăp hdră ksiêm dlăng, boh nik hŏng mnuih mrâo mŭt hlăm krĭng. K’iăng khua knŭk kna mtă brei mđĭ hdră ksiêm dlăng, boh nik hŏng mnuih mŭt hlăm ala čar soh hdră bhiăn, ăt msĕ mơh truă čhiăm guôm ƀô̆ ti anôk lu mnuih čiăng gang mkhư̆ klei đĭ lả mŏng klei ruă./.

H Nêč pô mblang