VOV4.Êđê - “Ktưmn truh hrue 1/7 anăp anei srăng mkăp truh 50 êklăk pŏk ka asei mâo chip điện tử kñăm bi ênưih phung ƀuôn sang ngă bruă”. Anei jing klei hưn mâo bi êdah ti anôk bi kƀĭn trực tuyến ksiêm wĭt bruă ngă bi ênưih djăp mta hră mơar kơ grăp čô mnuih, lehanăn mkăp jih jang klei hưn kơ asei grăp čô mnuih dôk hlăm klei kiă kriê ênoh mnuih wưng thŭn 2013 – 2020 (jing mta bruă mrô 896) mâo mkŏ mjing aguah mbruê (23/4), ti anôk bruă knŭk kna. Kơ klei mkăp mrô anak mnuih mdê mdê, tui hlue si hră hưn hrue kkiêng kơ hđeh mrâo kkiêng, yap mơ̆ng jih hrue 24/3 leh êgao, jih jang hdră mă bruă mơ̆ng klei bhiăn mâo ngă leh, lehanăn mâo mkăp leh 5 êklăk mrô anak mnuih kơ phung hđeh mrâo kkiêng jing mnuih Việt Nam. Blŭ hrăm ti anôk bi kƀĭn, k’iăng khua knŭk kna Trương Hoà Bình mtă, dŭm phŭn dhar bruă, alŭ wăl bi mguôp hŏng phŭn bruă kahan ksiêm kơ klei mă bruă, đru bi mklă brei klei jing mơ̆ng grăp čô mnuih, đru mkăp jih jang klei ksiêm dlăng leh mơ̆ng grăp čô mnuih./.

Y Khem pô mblang