VOV4.Êđê -Khă gơ̆ sa hlăm dŭm krĭng êa kdŭn ti čar Dak Lak, ƀiădah Lăk ăt tuôm hŏng klei dleh dlan hlăm bruă rơ̆ng djăp êa yua aguah tlam kơ mnuih ƀuôn sang, boh nik hlăm yan không. Wăt wăl krah Liên Sơn, giăm hang ênao Lăk, ênao êa čŏng mâo prŏng hĭn Lăn Dap Kngư, ƀiădah mâo lu mnuih ƀuôn sang nao blei êa yua aguah tlam. Klei anei dưi akâo leh hŏng anôk bruă djŏ tuôm lu blư̆, ăt lu blư̆ dưi čih yap, ƀiădah klei kƀah êa ăt lŏ dơ̆ng mâo.

Ăt msĕ hŏng lu gŏ sang mkăn ti wăl krah Liên Sơn, Ngô Côn Tâm ti êpul anôk dôk Hòa Thắng, dŭm hruê ară anei blei leh lu êa giêt ba wĭt mnăm lehanăn tŭk knă. Gŏ sang mâo knŏng 2 čô ung mô̆, ƀiădah yua êa ăt lu mơh, hlăm sa mlan ăt mơ̆ng 300.000-350.000 prăk. “Gŏ sang kâo mâo knŏng dua čô ung mô̆, hlăm sa hruê ăt yua truh kơ 20 lit êa kơ klei ƀơ̆ng mnăm. Tĭng hlăm sa mlan ăt luič truh 300.000-400.000 prăk. Êa mơ̆ng kƀăng êa ăt mâo mơh ƀiădah leh pom ƀuh êa mâo bring, knŏng mnei hgei lehanăn yua rao tač, sŭt sang đuič. Êa mâo klei bâo hngir lehanăn jŭ, kyuanăn amâo thâo thâo yua ôh, kyuanăn mnuih ƀuôn sang knap mñai sơnăk kyua kƀah êa yua grăp hruê. Hlăm dŭm klei bi kƀĭn bi tuôm hŏng dŭm čô khua bi ala amâodah êpul anôk dôk, mnuih ƀuôn sang hmei ăt mâo lu klei akâo kơ dŭm anôk bruă kơ dlông, ƀiădah diñu knŏng čih yap amâo mâo ƀuh ôh bruă mgaih msir kơ hmei.”

Aduôn Đoàn Thị Hồng ti êpul anôk dôk Hòa Thắng ăt brei thâo, Anôk mkăp êa doh kơ mnuih ƀuôn sang hlăm anôk anei sô jhat leh, lehanăn amâo lŏ mâo boh tŭ dưn ôh. Lu thŭn leh êgao, mnuih ƀuôn sang ti anôk anei blei êa giêt čiăng mnăm lehanăn tŭk knă. Kơ gŏ sang ñu jing sang mnia mnơ̆ng ƀơ̆ng huă, kyuanăn blei brŏng êa prŏng čiăng dưi djăp yua lehanăn duh bi liê lu prăk kăk hĭn. Aduôn Đoàn Thị Hồng lehanăn hŏng dŭm êtuh gŏ sang hlăm anôk anei mâo klei hmăng hmưi kơ dŭm anôk bruă djŏ tuôm srăng đru, ngă klei găl čiăng mâo êa yua doh lehanăn mâo klei êđăp ênang êjai mmông yua.“Sang kâo mkra kmŭn tram hra čiăng ba mnia ti sang mnia wăl krah, kyuanăn yua êa jing lu êdi. Yan hjăn kâo yua êa hjan mđŭ hŏng prŏng êa, yan điă bhang srăng yua êa maĭ, ƀiădah dŭm thŭn anei sô jhat leh, kyuanăn knŏng blei êa giêt wĭt yua yơh. Bruă blei êa luič liê lu ƀiădah bruă mnia blei amâo mâo prăk mnga ôh. Tuôm mâo klei hing ang mâo êa doh ti wăk krah, ƀiădah ară anei amâo mâo êa yua ôh. Mnuih ƀuôn sang hmei ară anei hmăng hmưi kơ knŭk kna srăng mâo klei mđing uêñ duh bi liê kơ hmei sa kdrăp êa doh čiăng kơ mnuih ƀuôn sang dưi tlaih kơ klei dleh dlan.”

Tui si klei nao ksiêm dlăng mơ̆ng bruă sang čư̆ êa wăl krah Liên Sơn brei ƀuh, hlăm kluôm wăl krah mâo 1.608 boh gŏ sang hŏng êbeh 6.590 čô mnuih. Ƀiădah mâo knŏng sa Anôk mkăp êa doh hŏng hnơ̆ng 150 m³/sa hruê/sa mlam. Anôk mkăp êa doh anei dưi duh bi liê mkŏ mkra ti thŭn 2000 lehanăn ară anei amâo lŏ jăk ôh, knŏng dưi mkăp mă êa mơ̆ng 90-100 m³/sa hruê/sa mlam, ka mâo 1/5 kơ hnơ̆ng klei čiăng.

Bruă sang čư̆ êa wăl krah Liên Sơn ăt mâo leh lu blư̆ mơĭt hră akâo truh kơ bruă sang čư̆ êa ti kdriêk lehanăn mâo leh klei čih yap, ƀiădah truh kơ ară anei, ti alŭ wăl wăl krah Liên Sơn ka lŏ mâo thiăm kdrăp êa doh dưi mkŏ mkra.

Tui hluê Nguyễn Anh Tú- khua hlăm anôk ksiêm dlăng hdră êlan ti kdriêk Lăk, lu thŭn ară anei, klei kƀah êa yua grăp hruê amâo djŏ knŏng hjăn wăl krah Liên Sơn ôh, ƀiădah wăt lu să mkăn msĕ si: să Dak Nuê, Dak Liêng, Ƀuôn Triă…. Sa kdrêč kyua dŭm să anei dôk ti anôk kgŭ hĭn, hnoh êa mâo klei msăm lehanăn bring. Kdrêč mkăn jing dŭm kdrăp ba êa doh sô jhat lehanăn amâo mâo lŏ thâo yua ôh.

Nguyễn Anh Tú brei thâo, pral êdi ăt truh thŭn 2023, bruă kƀah êa yua hlăm dŭm alŭ wăl ti kdriêk Lăk srăng dưi mâo klei mgaih msir, hŏng 4500 boh gŏ sang yua êa hlăm sa anôk mkăp êa doh 3.600 m³/sa hruê/sa mlam. “Truh kơ mmông anei HĐND čar Dak Lak bi mklă leh hdră êlan srăng duh bi liê hŏng ênoh 90 êklai prăk brei kơ bruă sang čư̆ êa krdriêk Lăk srăng mkŏ mkra anôk bruă êa pơ̆ng mkăp êa doh. Wưng tal 1 duh bi liê leh 5 êklai prăk kơ bruă ksiêm dlăng, ngă hră mơar lehanăn čuăl mkă. Lehanăn hlăm thŭn 2022 tui si hdră êlan duh bi liê mơ̆ng knơ̆ng bruă čuăl mkă srăng lŏ ngă wưng tal 2 hlăm hdră êlan anei. Srăng bi leh lehanăn ba yua hlăm thŭn 2023.”