VOV4.Êđê- Čiăng rơ̆ng kơ bruă gang mkhư̆ klei ruă Covid-19 hlăm hruê ruah khua, Knơ̆ng bruă mdrao mgŭn čar Lâm Đồng mâo leh hră mơar gĭt gai dŭm Sang êa drao, anôk ksiêm mkă mdrao mgŭn ti čar dăp mnuih, msir mgaih, mdrơ̆ng hŏng boh klei tăm mâo. Knơ̆ng bruă mdrao mgŭn čar Lâm Đồng mtă kơ dŭm sang êa drao gưl čar, anôk bruă mdrao mgŭn dŭm kdriêk, ƀuôn prŏng leh anăn Sang êa drao prŏng Hoàn Mỹ Đà Lạt, grăp anôk mkŏ mjing 1 êpul dŏng mdrao mjêč êrô hiu mâo phung aê mdrao, pô mgăt êdeh, mâo djăp ênŭm êa drao, kdrăp mnơ̆ng, êdeh mdiăng mnuih ruă čiăng hmao đru kơ dŭm kdriêk, ƀuôn prŏng leh anăn să, ƀuôn hgŭm, wăl krah.

Hưn mdah mrô đĭng blŭ pral mơ̆ng anôk bruă kơ dŭm să, ƀuôn hgŭm, wăl krah leh anăn dŭm Anôk bruă ruah khua hlăm čar čiăng hmao mă klei hâo hưn čiăng êdi. Êngao anăn, dŭm anôk bruă mdrao mgŭn hlăm čar brei jih jang êpul ngă bruă pral ngă bruă, hluê ngă hdră gang mkhư̆ klei ruă Covid-19 sĭt mâo klei truh. Dhar bruă ăt ba nao êbeh 1.100 čô knuă druh mdrao mgŭn gak răng ti jih jang anôk ruah khua čiăng pral gang mkhư̆ klei ruă tưp.

Pô mblang: H’Zawut Ƀuôn Yă