VOV4.Êđê - Dŭm hruê anei, klei tlĕ kuai mă mnơ̆ng hlăm gŭ lăn soh hŏng hdră bhiăn ti krĭng wăl siă knông plah wah să Tà Nùng, ƀuôn prŏng Đà Lạt lehanăn să Mê Linh, kdriêk Lâm Hà, čar Lâm Đồng lŏ bluh mâo lehanăn dôk mâo anăp ală mta. Lu krĭng čư̆ dliê mâo arăng tlĕ kuai mtŭk mtŭl čiăng mă lăn lehanăn boh tâo, hlăk bruă sang čư̆ êa alŭ wăl amâo mđing uêñ lui si čiăng ngă. Klei năng mđing, thŭn dih, anôk bruă sang čư̆ êa čar Lâm Đồng bi mklă đŭ bi kmhal leh lu anôk bruă kuai mă mnơ̆ng hlăm gŭ lăn, ƀiădah boh klei anei ăt dôk mâo nanao.

Truh hlăm kdrăn suah mbô, ti alŭ mrô 4, să Ta Nung, ƀuôn prŏng Đà Lạt hlăm hrue 10/5, ƀuh ti ală mta mtam jing dŭm ping čư̆ dôk hlăm lăn dliê alŭ wăl anei tuôm hŏng klei duah bi kuai klei mtŭk mtŭl, ƀah ƀil jih anôk ala pioh mă lăn lehanăn boh tâo. Jih jang bruă anei ngă soh hŏng klei bhiăn, amâo mâo klei lŏ mdăp ôh. Mnuih ngă bruă mưn kơ anei brei thâo, wưng leh êgao, sui sa blư̆ mâo phung knuă druh să hriê, ƀiădah jih jang bruă mă boh tâo ăt lŏ wĭt msĕ si hđăp. Bi Phan Quang Trung ti êpul mrô 14 hlăm alŭ mrô 4, să Ta Nung, dưi yap jing pô ba akŏ mă boh tâo soh hŏng klei bhiăn hlăm alŭ wăl anei lač, kyuadah amâo lŏ maoa bruă knuă mkăn pioh ngă ôh, lehanăn kăn mâo klei duah bi kčŭt rei, snăn mă yơh boh tâo kơ anei thâo mơh soh hŏng klei bhiăn.“Amâo mâo mnuih mjing brei ôh kle igăl kơ pô, si thâo lŏ mjing pô ăt mă, lehanăn kăn mâo klei duah bi kčŭt rei, snăn yơh boh sĭt jing. Mâo leh mơh dŭm blư̆ să mă kơ̆ng iêu êmuh, leh mghaih msir lŏ bi wĭt. Mdei hĕ knŏng bhiâo, kyuadah tơ mdei snăn amâo lŏ mâo bruă mă mkăn ôh, mơ̆ng anăn lŏ wĭt kuai mă boh tâo yơh čhĭ”.

Leh ksiêm êmuh, êngao kơ bruă mă lehanăn uă čăr boh tâo, snăn klei bi čuk kuai čư̆ pioh mă boh tâo lehanăn mă čuah soh hŏng klei bhiăn hlăm alŭ wăl ăt lŏ mâo lu. Tui si Liêng Hot Quil, knuă druh bruă lăn ala – lŏ hma – rŭ mdơ̆ng – wăl hdĭp mda să Ta Nung, phung tlĕ kuai mă boh tâo čuah êga, pătdah thâo ênŭm sơăi ya bruă amra nao ksiêm dlăng, snăn diñu pral đuĕ dăp jih:“Dleh dlan jing hlăm grăp blư̆ ayŏng adei trŭn nao ksiêm dlăng, diñu thâo êlâo sơăi, pătdah diñu gak răng kjăp mơ̆ng dlông leh. Êjai pô trŭn nao, diñu mdei hĕ êjai jih jang bruă diñu mă”.

Bi kra Jan Ha Djiêp, k’iăng khua să Ta Nung, ƀuôn prŏng Đà Lạt, êlâo anăn să mâo leh lu blư̆ nao ngă hră mơar kăm ghă jih jang bruă mă lăn boh tâo soh hŏng klei bhiăn hlăm alŭ wăl Suah Mbô anei, ƀiădah leh phat mkra, êpul ngă bruă đuĕ wĭt, snăn bruă kuai mă lăn boh tâo hlăm anei lŏ wĭt msĕ hđăp. Klei anei jing dleh dlan êdi hŏng bruă sang čư̆ êa:“Klei dleh dlan kơ alŭ wăl jing bruă phat mkra dleh mơh. Leh phat mkra mâo sa dua hrue kăm diñu lŏ nao kuai mă. Lač sĭt jing, hmei rŭng răng măng ai, bi phung mkăn hmei amâo mâo thâo ôh. Anei jing jih jang hră mơar, hmei mâo phat mkra leh lu blư̆”.

Tui si hŏng hră mơar mơ̆ng knơ̆ng bruă sang čư̆ êa să Ta Nung mkăp, klei bi klă đŭ bi kmhal klei ngă soh hlăm bruă mă mnơ̆ng hlăm gŭ lăn ti alŭ wăl Suah Mbô hlăk hrue 5/1/2021. Snăn, êbeh 5 mlan kơ anăn, bruă ksiêm dlăng, mghaih msir klei ngă soh mă mnơ̆ng hlăm gŭ lăn ti alŭ wăl anei bi phưi tha yơh, klei kuai mă soh hŏng klei bhiăn ti anei knư̆ hĭn ngă hŏng klei amâo lŏ mdăp ôh, lehanăn đĭ lar prŏng hĭn.

Hlăm wăl bi knông plah wah să Ta Nung, ƀuôn prŏng Đà Lạt hŏng să Mê Linh, kdriêk Lâm Hà ară anei hlăk dôk mâo ƀiă êdi truh kơ 4 anôk kuai mă boh tâo hŏng hnơ̆ng prŏng. Hlăm anăn mâo wăt anôk kuai mă hlăm kdrêč lăn dliê. Tui si phung ƀuôn sang alŭ wăl, bruă mă boh tâo soh hŏng klei bhiăn tinei mơ̆ng lu thŭn êgao leh, ngă bi mlih jih klei jing kơ lăn ala čư̆ dliê tinei, boh nik nak tơdah tuôm hŏng adiê hjan prŏng anăp lĕ hlăm klei klưh hroh jih. Klei dŭ boh tâo mŭt kbiă mơ̆ng alŭ wăl anei hlăk ngă dơ̆ng rai leh jih êlan klông, jing dŏ phung ƀuôn sang bi mguôp ngăn prăk mkra êlan anăn.

Êlâo anăn, knơ̆ng bruă sang čư̆ êa čar Lâm Đồng mâo leh lu hră mtrŭn gĭt gai dŭm anôk bruă djŏ tuôm hyuă kjăp bruă kiă kriê, ksiêm dlăng bruă mă boh tâo lăn čuah, mghaih msir bi ktang dŭm êpul bruă, mnuih ngă soh, mă boh tâo lăn čuah soh hŏng klei bhiăn.

Hrue 17/12 thŭn dih, Knơ̆ng bruă sang čư̆ êa čar Lâm Đồng mâo leh klei bi klă đŭ bi kmhal 5 phung ngă bruă mă mnơ̆ng hlăm gŭ lăn mâo lu mta klei ngă soh, msĕ si knơ̆ng bruă Hưng Nguyên, knơ̆ng bruă Hà Thanh, knơ̆ng bruă Hà Hưng, knơ̆ng bruă Đức Phú, knơ̆ng bruă Minh Định. Hŏng ênoh knơ̆ng bruă sang čư̆ êa čar Lâm Đồng đŭ jih jang dŭm knơ̆ng bruă ngă soh anăn êbeh 5 êklai 300 êklăk prăk. Khă snăn, klei duah kuai mă boh tâo, lăn čuah ăt lŏ adôk nanao hŏng klei amâo lŏ mdăp ôh ti alŭ wăl plah wah ti knông dua boh să Ta Nung, ƀuôn prŏng Đà Lạt, hŏng să Mê Linh, kdriêk Lâm Hà./.