VOV4.Êđê -  Khădah hmăi mơ̆ng klei ruă Covid 19, ƀiădah hlăm 3 mlan gưl 1 thŭn anei, dŭm alŭ wăl ti čar Lâm Đồng ăt dưi mjing klei găl msir mghaih bruă mă kơ giăm 6 êbâo čô mnuih mă bruă, đru mđĭ hnư hrui wĭt, bi h’ĭt klei hdĭp. Hlăm ênoh giăm 6 êbâo čô mnuih mă bruă dưi msir mghaih bruă mă snăn mâo êbeh 1.830 čô mnuih mâo bruă mă mrâo, êbeh 100 čô mnuih nao mă bruă kơ ala tač êngao, mâo 20% hdră kčah, đĭ 10% mkă hŏng wưng anei thŭn êlâo. Mbĭt anăn, Anôk bruă mnuih mă bruă, kahan êka êkeh lehanăn yang ƀuôn mkŏ mjing nanao dŭm hdră đru kčĕ, hưn mthâo bruă mă, hluê ngă hdră đru mtô bi hriăm bruă mguôp hŏng bruă pŏk ngă tŭ dưn hdră mtrŭn brei klei jăk găl, mjuăt bi hriăm bruă tinăn mtam hluê hŏng dŭm gru hmô, pla, dlăng kriê ana kphê, pla djam mtam hluê kdrăp mrâo, rông mnơ̆ng; mkŏ mjing hdră mtô bi hriăm bruă êngao kơ bruă lŏ hma msĕ si: mkra maĭ mŏk, mkra pui, mnơ̆ng yua hlăm gŏ sang, mkra mnơ̆ng hŏng kiê kngan, bruă tă kčoh, bruă rŭ mdơ̆ng… Anei jing dŭm bruă hlăk mâo klei găl, djŏ guôp hŏng dŭm anôk bruă duh mkra ti alŭ wăl mâo klei čiăng yua, đru rơ̆ng kjăp hdră kčah msir mghaih bruă mă kơ 13.000 - 15.000 mnuih mă bruă hlăm thŭn 2021 mơ̆ng čar Lâm Đồng./.

H Nêč pô mblang