VOV4.Êđê- Hruê kăm êgao, Knơ̆ng bruă sang čư̆ êa čar Lâm Đồng mâo leh mmông mă bruă hŏng Knơ̆ng bruă mnuih Việt Nam ti ala tač êngao ti ƀuôn prŏng Hồ Chí Minh mbĭt hŏng dŭm anôk bruă mnia blei jing mnuih Việt Nam ti ala tač êngao, phung ala tač êngao, kñăm bi kah mbha klei hâo hưn, bi mkŏ phung duh bi liê, anôk bruă mnia blei, mnuih Việt Nam ti ala tač êngao, čiăng iêu mthưr pŏk ngă dŭm mta bruă ti alŭ wăl.

Čar Lâm Đồng hưn mthâo leh hŏng êpul ngă bruă mơ̆ng Dhar bruă mnuih Việt Nam mă bruă kơ ala tač êngao ti ƀuôn prŏng Hồ Chí Minh lehanăn êpul êya phung mă bruă duh bi liê, anôk bruă duh mkra, mnuih Việt Nam mă bruă duh mkra ti ala tač êngao kơ klei găl mâo mơ̆ng čar Lâm Đồng; mkăp klei hâo hưn kơ dŭm mta bruă dôk iêu mthưr hdră duh bi liê msĕ si: Kơ bruă wăl hiu čhưn ênguê Ênao êa Prenn, Mta bruă ƀuôn prŏng Liên Khương- Prenn, Wăl anôk knhuah gru hiu čhưn ênguê ala čar ênao êa Tuyền Lâm v.v... Hluê si Nguyễn Văn Châu, K’iăng khua Knơ̆ng bruă Lŏ hma, mđĭ kyar krĭng ƀuôn sang čar Lâm Đồng, êngao klei găl hlăm bruă hiu čhưn ênguê, jak iêu grăp thŭn hlăm brô 7 êklăk čô tuê hriê čhưn, Lâm Đồng lŏ jing čar ba akŏ hlăm bruă ngă lŏ hma ba yua kdrăp mrâo, kyua anăn, čar dôk ngă hlăm bruă hưn mthâo, iêu mthưr lehanăn jak iêu lu phung duh bi liê hlăm lehanăn êngao čar.

“Dưi lač, anôk bruă lŏ hma Lâm Đồng mđĭ kyar amâo dưi kƀah ôh anôk bruă duh mkra, boh nik anôk bruă duh mkra ala tač êngao čiăng kơ anôk bruă lŏ hma alŭ wăl mđing truh kơ wăl anôk čhĭ mnơ̆ng kơ ala tač êngao, mđĭ boh tŭ djŏ tuôm hlăm tar rŏng lăn. Boh nik, dŭm mta mnơ̆ng mâo klei găl msĕ si čê, kphê, djam mtam, mnga lehanăn rông êmô mă êa ksâo... Tơdah phung duh bi liê ksiêm dlăng êlam lehanăn mâo hdră duh bi liê srăng đru kơ čar Lâm Đồng đĭ kyar hĭn”.

Leh mmông mă bruă hŏng čar, êpul ngă bruă mơ̆ng Dhar bruă mnuih Việt Nam mă bruă kơ ala tač êngao ti ƀuôn prŏng Hồ Chí Minh lehanăn dŭm anôk bruă duh mkra, phung duh bi liê mă leh bruă hŏng phung khua kiă kriê kdriêk Lạc Dương, nao čuă dlăng Êpul group Liên Minh, Anôk bruă mnơ̆ng lŏ hma Langbiang lehanăn nao ksiêm dlăng dŭm mta bruă dôk ngă ti Lâm Đồng čiăng iêu mthưr hdră duh bi liê:

Steve Bùi, Khua knơ̆ng êpul group Delta E&C Japan brei thâo, ară anei phung mă bruă duh bi liê, anôk bruă duh mkra, mnuih Việt Nam mă bruă duh mkra ti ala tač êngao brư̆ hruê ƀrư̆ mâo lu klei čiăng lŏ wĭt kơ ƀuôn sang pô duh bi liê. Kyua anăn, gưl nao tui ksiêm boh sĭt anei srăng jing kdrông mkŏ, boh kdrŭt yuôm bhăn pŏk sa klei găl mrâo kơ anôk bruă duh mkra, mnuih Việt Nam mă bruă ti ala tač êngao nao hgŭm hlăm hdră duh bi liê mơ̆ng čar. Steve Bùi mñă klă:

“Hmei ăt ƀuh klă čar Lâm Đồng jing sa anôk jak iêu hdră duh bi liê lu êdi, dŭm hdră mtrŭn klă mngač, mjing klei găl tuič hnơ̆ng kơ phung duh bi liê hlăm lehanăn êngao ala čar truh hŏng čar. Čang hmăng mơ̆ng gưl tui ksiêm anei, hmei srăng mâo hdră bi hgŭm kjăp hlăm bruă kah mbha klei hâo hưn lehanăn dưi ruah Lạc Dương jing anôk jưh tal êlâo ti čar Lâm Đồng anei.

Hŏng klei gĭr mơ̆ng alŭ wăl čiăng ba dŭm hdră mtrŭn djŏ guôp, klei đăo knang kơ phung mă bruă duh mkra, Lâm Đồng hlăk dôk mjing boh kdrŭt kơ hdră mđĭ kyar bruă duh mkra hluê hŏng dŭm klei găl mâo mơ̆ng pô, hluê ngă hdră kñăm mđĭ kyar bruă duh mkra, ala ƀuôn h’ĭt kjăp./.

Pô mblang: Y-Khem Niê