VOV4.Êđê -Anôk bruă sang čư̆ êa čar Lâm Đồng mâo leh mmông mă bruă hŏng Dhar bruă mnuih Việt Nam ti ala tač êngao ti ƀuôn prŏng Hồ Chí Minh mbĭt hŏng phung mă bruă duh mkra jing mnuih hdĭp ti ala tač êngao, mnuih ala tač êngao, kñăm bi kah mbha klei hâo hưn, bi hgŭm hŏng phung mă bruă duh bi liê, anôk bruă duh mkra, mnuih Việt Nam ti ala tač êngao, čiăng iêu mthưr pŏk ngă dŭm mta bruă ti alŭ wăl.

Čar Lâm Đồng hưn mthâo leh kơ êpul mă bruă mơ̆ng Dhar bruă mnuih Việt Nam ti ala tač êngao ti ƀuôn prŏng Hồ Chí Minh lehanăn êpul êya phung mă bruă duh bi liê, duh mkra mnia mblei, phung mă bruă duh mkra mnuih Việt Nam ti ala tač êngao kơ klei găl mâo mơ̆ng čar Lâm Đồng; mkăp klei hâo hưn kơ dŭm mta bruă dôk iêu mthưr klei duh bi liê msĕ si: Bruă wăl hiu čhưn ênao êa Prenn; Hdră bruă ƀuôn prŏng Liên Khương - Prenn, Wăl anôk hiu čhưn ala čar Ênao êa Tuyền Lâm. Steve Bùi, Khua knơ̆ng êpul group Delta E &C Japan brei thâo, gưl nao tui ksiêm anei jing kdrông mkŏ, klei găl yuôm bhăn pŏk lu klei găl kơ anôk bruă duh mkra, phung mă bruă duh mkra mnuih Việt ti ala tač êngao nao hgŭm duh bi liê hlăm čar./.

H Nêč pô mblang