VOV4.Êđê -  Aguah hruê 26/3, HĐND čar Lâm Đồng gưl IX mphŭn pŏk Klei bi kƀĭn tal 18 čiăng ksiêm dlăng, bi mklă dŭm hdră mtrŭn yuôm bhăn kơ hdră mđĭ kyar bruă duh mkra – ala ƀuôn mŏng alŭ wăl. Ti anôk bi kƀĭn, phung bi ala ksiêm dlăng, bi trông lehanăn bi mklă Klei čih mkra dŭm hdră mtrŭn yuôm bhăn kơ bruă duh bi liê knŭk kna, msĕ si: Hdră mtrŭn bi mklă bruă duh bi liê, mkra mlih hdră duh bi liê kơ dŭm hdră bruă knŭk kna; mkra mlih, thiăm mbŏ hdră kčah duh bi liê knŭk kna mă mŏng ngăn prăk alŭ wăl thŭn 2021; hdră kčah duh bi liê knŭk kna mâo hdră kñăm mă mŏng ngăn prăk gưl dlông thŭn 2021.

Boh nik, klei bi kƀĭn tal anei lŏ ksiêm dlăng Hră ba mdah Hdră mtrŭn bi mklă bruă duh bi liê kdrêč êlan êran pral Tân Phú (Đồng Nai) - Bảo Lộc (Lâm Đồng) mâo boh taih 67 km hluê hdră duh bi liê bi hgŭm knŭk kna – êngao knŭk kna. Hdră bruă êlan êran pral anei dưi ngă leh srăng ƀrư̆ ƀrư̆ dưi bi leh ktuê êlan êran pral Dầu Giây – Đà Lạt hluê si hdră čuăl mkă maoa Khua knŭk kna bi mklă, mjing boh kdrŭt mđĭ kyar bruă duh mkra ala ƀuôn, rŏng klei êđăp ênang dŭm čar hlăm krĭng Lăn dap kngư./.

H Nêč pô mblang