VOV4.Êđê- Hruê 6-10, Knơ̆ng bruă sang čư̆ êa čar Lâm Đồng mâo hră mơar gĭt gai dŭm knơ̆ng, dhar bruă, êpul leh anăn Knơ̆ng bruă sang čư̆ êa dŭm kdriêk, ƀuôn prŏng hlăm čar mprăp tlŏ vaccin gang mkhư̆ klei ruă Covid-19 hŏng ênoh lu. Knơ̆ng bruă sang čư̆ êa čar Lâm Đồng jao kơ Knơ̆ng bruă mdrao mgŭn čar gĭt gai, bi hgŭm hŏng dŭm knơ̆ng, dhar bruă djŏ tuôm leh anăn Knơ̆ng bruă sang čư̆ êa dŭm kdriêk, ƀuôn prŏng hlăm čar mkŏ mjing hdră, mprăp kdrăp mnơ̆ng, mnuih mă bruă pŏk ngă klei tlŏ vaccin mơ̆ng ară anei truh knhal jih thŭn 2021. Mbĭt hŏng anăn, ngă klei ktuê dlăng, bi klin ênoh mnuih leh anăn čih anăn jih jang phung dưi tlŏ hluê si klei kčah mtrŭn.

Lâm Đồng dôk mkŏ mjing hdră kčah tlŏ vaccin Covid-19 kơ lu mnuih

Phŭn bruă mdrao mgŭn mbha mrâo mbha kơ čar 2 êtuh êbâo vaccin Vero Cell leh anăn čar dôk pŏk ngă klei tlŏ mgang aruăt tal 1 ti dŭm kdriêk, ƀuôn prŏng hlăm čar. Mbĭt hŏng êbeh 233 êbâo aruăt vaccin dưi tlŏ mgang mơ̆ng êlâo leh anăn hdră kčah mĭn tĭng mbha dŭm ênon vaccin Covid-19 hlăm wưng kơ anăp, truh knhal jih thŭn anei, Lâm Đồng srăng djăp 70% ênoh mnuih ƀuôn sang êbeh 18 thŭn dưi tlŏ mgang.

Pô mblang: H’Zawut Ƀuôn Yă