VOV4.Êđê - Aguah 17/5, bruă sang čư̆ êa čar Lâm Đồng mâo leh hră tŭ ư brei kơ hđeh sang hră gưl 3, hđeh hriăm, sinh viên dŭm sang hră hlăm alŭ wăl srăng mkŏ mkra klei bi lông klei hriăm tal 2 hlăm 3 hruê lehanăn srăng bi leh êlâo kơ hruê 21/5 ti anăp. Hlăm klei mtă kơ knơ̆ng bruă sang hră mơar čar Lâm Đồng, bruă sang čư̆ êa čar Lâm Đồng tŭ ư srăng brei kơ hđeh sang hră, mnuih hriăm, sinh viên hlăm dŭm sang hră dŭm adŭ ka bi leh klei bi lông hlăm klei hriăm tal 2 srăng lŏ mkŏ kra klei bi lông hlăm dŭm hruê 19,20,21/05, dŭm čô mkăn srăng brei mdei nao sang hră.

Leh bi ruê̆ klei bi lông anei, dŭm čô hđeh sang hră, mnuih hriăm lehanăn sinh viên hlăm dŭm sang hră srăng mdei sang hră čiăng gang mkhư̆ klei ruă tưp Covid-19. Bi kơ hđeh sang hră adŭ 12, bruă sang čư̆ êa čar mta kơ knơ̆ng bruă mtô mjuăt lehanăn sang hră mơar srăng đru hlăm bruă ksiêm wĭt klei hriăm gưl tlâo hŏng êlan trực tuyến. Bi kơ dŭm anôk dleh dlan, anôk mnuih djuê ƀiă, amâo mâo kdrăp yua hŏng êlan Trực tuyến srăng dưi mâo adŭ ksiêm wĭt klei hriăm, ƀiădah srăng rơ̆ng klei doh, mdjiê kman hlăm sang hră mơar, mnơ̆ng dhơ̆ng yua êlâo kơ hđeh truh ti sang hră mơar. Êjai nao hlăm klei hriăm, amâo dưi kƀĭn êgao 30 čô mnuih lehanăn guôm bô̆ mta, mdjiê kman, hưn mdah bruă mdrao mgŭn, dôk bi kbưi lehanăn ngă djŏ hdră bhiăn hlăm bruă gang mkhư̆ klei ruă tưp.