VOV4.Êđê - Kñăm mjing klei găl čiăng kơ phung mgơ̆ng ruah ngă pô bi ala Quốc hội gưl XV lehanăn bi ala HĐND dŭm gưl čar Lâm Đồng wưng thŭn 2021 – 2026 bi tuôm hŏng mnuih ƀuôn sang, hluê ngă hdră mtrŭt mjhar klei ruah khua, Dhar bruă ruah khua čar Lâm Đồng mkŏ mjing leh dŭm anôk bi tuôm hŏng êpul êya ruah khua hlăm čar djŏ si klei kčah mtrŭn lehanăn hruê mmông bi kčah.

Hlăm anăn, čar mkŏ mjing leh 40 anôk bi tuôm hŏng mnuih ƀuôn sang ti 3 êpul êya ruah pô bi ala Quốc hội gưl XV, 142 anôk bi tuôm hŏng mnuih ƀuôn sang ti 18 êpul êya ruah pô bi ala HĐND čar gưl X, wưng thŭn 2021 – 2026. Ti dŭm anôk bi tuôm hŏng mnuih ƀuôn sang hluê ngă kjăp hdră ksiêm dlăng lehanăn rơ̆ng klei êđăp ênang hlăm hdră gang mkhư̆ klei ruă Covid 19. Knŏng ti êpul êya ruah khua mrô 1 mơ̆ng pô bi ala Quốc hội gưl 1 mâo dŭm kdriêk Lạc Dương, Đơn Dương, Đức Trọng lehanăn ƀuôn prŏng Đà Lạt, kyua klei mâo dleh dưi ksiêm dlăng mơ̆ng klei ruă Covid 19, Lâm Đồng bi mlih leh hdră mkŏ mjing hŏng mnuih ƀuôn sang mơ̆ng phung bi ala dơ̆ng mơ̆ng dră klă anăp jing hdră trực tuyến. Truh ară anei, bruă mkŏ mjing hdră bi tuôm hŏng mnuih ƀuôn sang kơ phung bi ala Quốc hội gưl XV lehanăn bi ala HĐND dŭm gưl mơ̆ng čar Lâm Đồng dưi hluê ngă leh djŏ si klei kčah mtrŭn./.

H Nêč pô mblang