VOV4.Êđê - Êpul phung čhĭ mnia mda asei Việt Nam mrâo bi mguôp hŏng êpul group TTC lehanăn êpul klei čhĭ mnia mda asei čar Lâm Đồng mkŏ mkra knăm mđup mbrei 1.000 hnơ̆ng kdrăp ksiêm mkă kman SARS-CoV- 2 kơ čar Lâm Đồng čiăng hmao đru hlăm bruă gang mkhư̆ klei ruă tưp Covid-19. Blŭ hlăm knăm anăn, Trần Mến - khua kiă kriê êpul group TTC Lâm Đồng bi êdah: Tar ala čar dôk mđĭ dŭm hdră gang mkhư̆ klei ruă tưp Covid-19, lu čar ngă leh klei dôk bi kbưi hlăm yang ƀuôn, ngă klei mjêč hlăm bruă tui duah dŭm čô mnuih mâo klei jĕ giăm hŏng mnuih ruă lehanăn čuăl krĭng lu alŭ wăl. Đà Lạt jing ƀuôn prŏng kơ bruă hiu čhưn ênguê, kyuanăn bruă dưi ksiêm dlăng klei ruă tưp mâo boh tŭ dưn hlăm bruă bi hrŏ klei tưp lar mơ̆ng kman hlăm yang ƀuôn, bi hrŏ klei hmăi amâo jăk kơ bruă duh mkra- ala ƀuôn, boh nĭk hlăm bruă hiu čhưn ênguê. Mbĭt hŏng anăn, ngă bruă pral čiăng dưi krơ̆ng kơ buôn prơ̆ng amâo srăng mâo mnuih ruă srăng dưi đru kơ bruă hiu čhưn ênguê ti čar Lâm Đồng dưi mâo klei mgaih msir djăl leh dưi ksiêm dlăng klei ruă tưp.