VOV4.Êđê- Phŭn bruă kahan ksiêm čar Dak Lak mrâo  mkŏ mjing hdră bi tuôm čiăng bi hdơr 90 thŭn hruê mkŏ mjing êpul hlăk ai Cộng Sản Hồ Chí Minh,  phung bi ala dưi bi hdơr leh dŭm knhuah gru 90 thŭn hruê mkŏ mjing êpul hlăk ai Cộng Sản Hồ Chí Minh, lŏ wĭt dlăng ai tiê jhŏng ktang, čuăn nao mơ̆ng êpul êdam êra kahan ksiêm čar Dak Lak ti lu bruă knuă, bi đru hlăm bruă răng mgang klei êđăp ênang hlăm čar, hlăm thŭn 2020, dŭm êpul Đoàn hlăm êpul kahan ksiêm čar Dak Lak dưi ngă leh 126 blư̆ klei nao đru kơ dŭm alŭ, ƀuôn sang, dŭm să hŏng ênoh bi liê giăm 3 êklai prăk. Mđŭp brei 23 hnư đru kơ hđeh sang hră “đru hđeh nao kơ sang hră mơar” kơ dŭm čô hđeh sang hră mâo klei hdĭp dleh dlan, hŏng ênoh prăk 82 êklăk prăk. Nao mbha 20,000 čhiăm guôm ƀô̆ mnal jăk hŏng jih ênoh truh 150 êklăk prăk čiăng đru kơ mnuih ƀuôn sang gang mkhư̆ klei ruă tưp covid-19. Leh anăn lŏ iêu mthưr, đru mguôp dŭ mdiăng 8 tôn mnơ̆ng dhơ̆ng, 420 êklăk prăk đru kơ mnuih ƀuôn sang krĭng kwar krah hmăi kyua klei truh mơ̆ng yan adiê. Leh anăn nao hgŭm myơr leh giăm 600 hnơ̆ng êrah.

Bruă êdam êra čar Kontum mrâo hgŭm hŏng knơ̆ng bruă sang hră mơar mkŏ mjing hrue mơak “Hđeh êlăk hơ̆k mơak suaih – anăp truh kơ klei mŭt đoàn”. Hlăm hrue mơak anei, phung hđeh hriăm hră ngă leh klei ruĕ tui si klei bhiăn đội kkuh mơak bi hdơr 90 thŭn hruê mkŏ mjing Êpul êdam êra Cộng sản Hồ Chí Minh (26/3) mâo dŭm klei mdah kdŏ mmuiñ hŏng akŏ ƀuôn sang lăn čar, kơ knhuah gru bruă êdam êra cộng sản Hồ Chí Minh lehanăn hđeh êlăk Việt Nam. Ƀri wưng anei, bruă êdam êra čar Kontum mđup brei 13 hnư prăk đru hriăm hră mơar kơ hđeh hriăm hră mâo klei thâo tŭ kdlưn gưl hriăm leh êgao./.

 Pô mblang: Y-Khem Niê