VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19, bruă sang čư̆ êa lehanăn dŭm anôk bruă djŏ tuôm ti krĭng Lăn dap kngư dôk mđĭ dŭm hdră msir gang mkhư̆ klei ruă. Mbĭt hŏng bruă gang mkhư̆ kjăp klei tlĕ mŭt knông lăn soh hdră bhiăn, bi ktlah dŭm čô mnuih djŏ tuôm hŏng pô ruă Covid 19, anôk bruă mdrao mgŭn ăt pŏk ngă dŭm hdră mjêč kñăm gang mkhư̆ klei đĭ lar mơ̆ng klei ruă tưp anei.

Ti Kon Tum, êpul lĭng kahan răng mgang knông lăn mđĭ ktang êpul čiăng gang mkhư̆ dŭm phung găn knông lăn soh hŏng hdră bhiăn ti dua ktuê knông lăn bi knông hŏng Lao leh anăn Campuchia. Klă klơ̆ng, giăm 100 čô lĭng kahan dưi tiŏ nao ti 8 Kđông răng mgang knông lăn čar Kon Tum. Đại tá Lê Minh Chính,  Khua bruă Đảng Êpul lĭng kahan răng mgang knông lăn čar Kon Tum brei thâo, mbĭt hŏng bruă dưi mbŏ êpul lĭng kahan, knuă druh, lĭng kahan hlăm ktuê knông lăn dlông êbeh 292 km bi knông hŏng Lao leh anăn Campuchia ăt dưi mđing dlăng, mđĭ ai hlăm ai tiê wăt mnơ̆ng dhơ̆ng hlăm hdră bruă klam mdua kriê dlăng răng mgang knông lăn leh anăn gang mkhư̆ klei ruă Covid-19.

            “Êngao kơ klei dưi dưn hdră êlan mơ̆ng Đảng, Knŭk kna, Êpul lĭng kahan mđing dlăng snăn Bruă Đảng čar, Knơ̆ng bruă sang čư̆ êa čar ăt msĕ si dŭm anôk bruă nao dlăng, mđĭ ai, đru kơ ayŏng adei dŭm kdrăp mnơ̆ng mdrao mgŭn, kdrăp kơ êa yua aguah tlam, kơ pui kmlă êran hŏng êran hŏng pil yang hruê čiăng đru sa kdrêč kơ ayŏng amai anei hơĭt ai tiê mă bruă ti knông lăn. Hmei ăt ngă jăk hdră 4 ti năn mtam. Ti dŭm anôk mâo êa đoh snăn ayŏng adei mđĭ bruă rông mnơ̆ng čiăng mđĭ hnơ̆ng jăk mnơ̆ng ƀơ̆ng kơ êpul lĭng kahan leh anăn mđĭ lar dŭm klei bhiăn msĕ si ti Kđông kahan čiăng kơ ayŏng adei mâo klei suaih pral jăk čiăng hluê ngă bruă klam mdua.

             Ti anăp klei dleh ktuê dlăng mơ̆ng klei ruă tưp, Knơ̆ng bruă sang čư̆ êa čar Dak Lak gĭt gai leh Knơ̆ng bruă sang čư̆ êa gưl kdriêk, să pral bi hgŭm hŏng dŭm anôk bruă djŏ tuôm gĭt gai ba yua dŭm hdră kăm ghă čiăng gang mkhư̆ klei ruă tưp ti čar mơ̆ng krah mlam hruê 10-5-2021 êla truh mâo klei hâo hưn mrâo. Klă klơ̆ng, mdei dŭm bruă bi kƀĭn, dŭm klei bi kƀĭn êbeh 30 čô hlăm 1 boh adŭ  (hjăn dŭm klei bi kƀĭn phung bi ala kơ mnuih ƀuôn sang ngă tui si klei kčah mtrŭn mơ̆ng Knơ̆ng bruă ruah khua čar), mkhư̆ bruă kƀĭn lu mnuih êngao anôk bruă knŭk kna, sang hră, sang êa drao, mdei dŭm bruă kƀĭn êbeh 30 čô mnuih kơ dlông ti anôk kkuh mkpŭ, mdei jih jang dŭm bruă dhar kreh, mjuăt asei mlei, hlăp mbul ti dŭm anôk lu mnuih, mdei mkŏ mjing klei huă mnăm bi kuôl ung mô̆, đĭ dôk sang mrâo. hŏng klei djiê ƀrŭ brei mnuih ƀuôn sang mkŏ mjing khuăt, mkhư̆ bi kƀĭn lu mnuih leh anăn ngă bi jăk bruă truă čhiăm guôm ƀô̆, mdjiê kman.

Êpul kahan răng mgang knông lăn  gang mkhư̆ klei ruă Covid-19

  Truh mmông anei, Dak Lak ƀuh leh 2 čô djŏ kman Sars - Cov-2, dôk hlăm sa boh sang ti ƀuôn prŏng Ƀuôn Ama Thuôt. Wăl mnuih ƀuôn prŏng mâo 2 čô anei dưi kwang dar. Sa boh sang hră hđeh điêt, anôk hđeh F1, dôk mbĭt hŏng 2 čô ruă anei, ăt brei kđăl ƀăng mdjiê kman. Kyua mâo 1 čô hđeh jing F1 mnuih ruă mrô 3237,  Knơ̆ng bruă sang čư̆ êa čar Dak Lak bi mklă brei jih jang sang hră hđeh điêt ti ƀuôn prŏng Ƀuôn Ama Thuôt mdei 1 hruê kăm, čiăng pŏk ngă dŭm hdră gang mkhư̆. Djŏ tuôm kơ phung hđeh sang hră dôk hlăm wăl dôk kwang dar, Đoàn Ngọc Thượng,  K’iăng Khua Knơ̆ng bruă sang čư̆ êa ƀuôn prŏng Ƀuôn Ama Thuôt brei thâo:

“Hŏng phung hđeh sang ară anei hlăk mprăp mŭt hlăm klei bi lông hriăm jih gưl 2 thŭn hriăm 2020-2021 snăn hmei gĭt gai êpul bruă djŏ tuôm ksiêm dlăng hlăm wăl bi ktlah hjăn čiăng mâo anăn klă klơ̆ng. Leh mâo anăn klă klơ̆ng snăn hmei brei bi lông mbŏ hlăm boh klei phung hđeh amâo nao bi lông mbĭt hlăm klei bi lông gưl 2 thŭn 2020-2021”

 Wăl bi ktlah hjăn ti čar Dak Lak

Aguah hruê 10-5, Anôk bruă ksiêm dlăng klei ruă čar Dak Lak brei thâo mâo klei tŭ ksiêm mkă tal 1 phung dôk hlăm wăl ƀuôn sang bi ktlah hjăn djŏ tuôm kơ mnuih ruă mrô 3237 leh anăn 3334. Hluê anăn, jih jang phung dôk wăl bi ktlah hjăn ti 189/1/ Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak) mâo 144 čô mnuih mâo klei tŭ ksiêm mkă tal 1 amâo djŏ ôh kman SARS-CoV-2.

 Hruê kăm êgao, Knơ̆ng bruă sang čư̆ êa čar Dak Nông, Lâm Đồng, Kon Tum mâo leh hră mơar mtă brei mdei dŭm bruă ngă kñăm ngă bi jăk dŭm hdră gang mkhư̆ Covid-19. Hluê anăn, dŭm hdră bruă amâo klă sĭt čiăng êdi msĕ si sang ƀar, karaoke, anôk hlăp điện tử huĭ tưp klei ruă Covid-19 ti čar brei mdei bruă ngă. Anôki bruă gantg mkhư̆ klei ruă tưp kơ mnuih ti čar Dak Nông mtă kơ dŭm êpul bruă djŏ tuôm bi hgŭm hyuă kjăp ktuê dlăng klei ruă tưp ti dŭm ƀăng jang knông lăn. Anôk bruă djŏ tuôm mđĭ ktang bruă ksiêm dlăng truă čhiăm guôm ƀô̆, dôk bi kbưi ti dŭm anôk lu mnuih, boh nik ti dŭm wăl, anôk hiu čhưn ênguê, đŭ bi kmhal phung ngă soh tui si hdră bhiăn.

 Mnuih ƀuôn sang čar Dak Nông nao hưn klei suaih pral

Ăt hlăm hruê kăm êgao, ti krĭng wăl Lăn Dap Kngư mâo đa đa bi ktlah hjăn kyua djŏ tuôm kơ mnuih ruă Covid-19. Klă klơ̆ng, Anôk bruă mdrao mgŭn kdriêk bi ktlah hjăn 1 čô F1 hŏng mnuih ruă Covid-19 ti čar Vĩnh Phúc leh anăn hlăk mjêč  hiu duah phung bi tuôm ba bi ktlah hjă. Bi ti Dak Lak, hruê kăm êgao, Anôk bruă mdrao mgŭn wăl krah Êa Pôč, kdriêk Čư̆ Mgar mâo bi tuôm hŏng 1 čô mnuih ruă nao ksiêm mkă wĭt mơ̆ng ƀuôn prŏng Đà Nẵng. Pô anei mâo klei bi knăl msĕ si Covid-19, mtŭk, êngoh hlơr, rôč êa dŭng… Leh hmư̆ klei hâo hưn, pô anei dưi mă mta ksiêm mkă mơĭt kơ Anôk bruă ksiêm mkă Lăn Dap Kngư leh anăn dôk guôn klei tŭ. Ară anei pô anei dưi ba bi ktlah hjăn ti Anôk mdrao klei ruă tưp mơ̆ng Anôk bruă mdrao mgŭn kdriêk Čư̆ Mgar.

Pô mblang: H’Zawut Ƀuôn Yă