VOV4.Êđê - Anăp mđing truh knăm bi hdơr 90 thŭn Hruê mkŏ mjing bruă Đoàn êdam êra Cộng sản Hồ Chí Minh, aguah hruê 18/3, knơ̆ng bruă kđi čar lĭng kahan yang ƀuôn Việt Nam mkŏ mjing leh Knăm bi hdơr hruê mkŏ mjing bruă Đoàn êdam êra Cộng sản Hồ Chí Minh, bi mni kơ phung knuă druh Đoàn êdah kdlưn wưng thŭn 2016 – 2020 lehanăn phung mda asei êdah kdlưn kluôm lĭng kahan thŭn 2020. Čih yap dŭm klei đru mguôp prŏng prĭn mơ̆ng êpul knuă druh Đoàn tŭ ngă bruă klam kơ hdră bruă êdam êra wưng êgao, ti knăm anei, Khua knơ̆ng bruă kđi čar mđup brei leh hră pah mni kơ 90 čô knuă druh Đoàn, knuă druh păn ngă hdră bruă êdam êra mâo boh tŭ êdah kdlưn hlăm wưng thŭn 2016-2020 hlăm kluôm anôk bruă lĭng kahan lehanăn mđup brei hră pah mni kơ 18 čô êdam êra mâo klei čang hmăng hlăm kluôm êpul kahan thŭn 2020. Êlâo anăn, Khua phŭn bruă lĭng kahan mđup brei leh Hră pah mni kơ 10 čô êdam êra êdah kdlưn hlăm kluôm anôk bruă lĭng kahan./.

H’Nêč pô mblang