VOV4.Êđê- Mâo klei tŭ ư mơ̆ng Êpul hgŭm ruah khua ala čar, hruê mgi, hruê 22/5, 7 kđông kahan răng mgang knông lăn lehanăn Tiêủ đoàn mjuăt bi hriăm knhăk hlăm Knơ̆ng gĭt gai lĭng kahan răng mgang knông lăn čar Dak Lak srăng hluê ngă hdră ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026 hnưm. Truh ară anei, hdră mprăp kơ gưl ruah khua mâo leh Knơ̆ng gĭt gai lĭng kahan răng mgang knông lăn čar Dak Lak bi hgŭm hŏng Anôk bruă sang čư̆ êa čar Dak Lak mprăp djăp ênŭm, mprăp kkuh drông dŭm êtuh čô bi ala h’ô ao grat mtah nao mplĕ hră hluê ngă klei dưi lehanăn bruă klam mơ̆ng pô.

Truh ti kđông lĭng kahan knông lăn mrô 737, să Ia R’Vê, kdriêk Êa Suop, hlăm dŭm hruê anei hmei ƀuh klei mtluk mtlak mơak mñai hlăm hruê ruah khua. Ti anôk ruah khua mrô 11 (hlăm sang bi kƀĭn kđông kahan răng mgang knông lăn mrô 737), bruă bi msiam kơ adŭ bruă, krih êa drao mdjiê kman gang mhkư̆ klei ruă tưp, hră anăn phung mgơ̆ng asei lehanăn hră anăn phung mplĕ hră, huôm mplĕ hră … dưi mâo klei mprăp jăk.

Êpul răng mgang knông lăn Dak Lak bi hgŭm hŏng Knơ̆ng bruă ruah khua čar Dak Lak mprăp bi leh kơ bruă ruah khua hnưm ti dŭm kđông kahan răng mgang knông lăn leh anăn êpul kahan mjuăt bi hriăm knhăk

          Binh nhất Hà Văn Piêng 21 thŭn, ti kđông lĭng kahan mrô 737 lač, anei jing gưl ruah khua tal êlâo hĭn ñu nao ruah. Jih mlan anei, hlăm dŭm mmông mdei leh kơ bruă hiu suang, ñu lehanăn dŭm čô ƀing găp lĭng kahan mkăn nao dlăng nanao hlăm adŭ bruă čiăng ksiêm dlăng anăn phung mgơ̆ng asei lehanăn dưi mâo klei čuăn ruah bi djŏ. Truh kơ ară anei, mbĭt hŏng bruă thâo săng klă kơ dŭm čô mgơ̆ng asei, jih jang mnuih hlăm kđông kahan mâo leh sơăi hră nao mplĕ lehanăn mprăp srăng mplĕ hră hruê mgi, 22/5

“Kâo mâo nanao klei ksiêm duah čiăng thâo sang klă dŭm čô mgơ̆ng asei ngă pô bi ala Quốc Hội gưl 15 lehanăn HĐND dŭm gưl wưng thŭn 2021-2026. Kâo hmăng hmưi srăng dưi čuăn ruah dŭm čô mnuih mâo knhuah hdĭp jăk lehanăn klei thâo čiăng nao hgŭm hlăm Quốc Hội lehanăn HĐND Dŭm gưl, čiăng kơ diñu đru hlăm bruă mkŏ mkra krĭng ƀuôn sang, ala čar mdrŏng sah.”

Bi ala dŭm Êpul ruah khua ksiêm dlăng anăn phung ruah khua čiăng kơ phung bi ala kơ mnuih ƀuôn sang thâo kơ bruă ngă phung mgơ̆ng asei

          Thượng tá Nguyễn Xuân Sơn- khua bruă kđi čar ti kđông lĭng kahan mrô 737 brei thâo, tui ngă klei gĭt gai mơ̆ng knơ̆ng gĭt gai bruă kahan răng mgang knông lăn čar Dak Lak kơ bruă mkŏ mjing klei ruah khua hnưm, dŭm hruê êgao, anôk bruă Đảng lehanăn êpul gĭt gai ngă leh lu klei hâo hưn kơ klei bhiăn ruah khua, klei jing mơ̆ng dŭm čô mgơ̆ng asei, klei dưi lehanăn bruă klam mơ̆ng phung mplĕ hră hŏng dŭm čô knuă druh, lĭng kahan ti kđông kahan. Tiŏ nao 9 čô knuă druh hlăm kđông kahan hrăm mbĭt hŏng dhar bruă ruah khua čar Dak Lak mkŏ mkra êpul ruah khua, hră anăn phung mplĕ hră, klah kčŭn klei hdĭp phung mgơ̆ng asei čiăng kơ dŭm čô knuă druh lehanăn lĭng kahan dưi čuăn ruah bi djŏ. Mbĭt hŏng anăn, kđông kahan ăt mâo klei gĭt gai 100% ênoh lĭng kahan, mđĭ bruă nao gak, ksiêm dlăng ti knông lăn ala čar, hlăm dŭm anôk ruah khua, boh nĭk hlăm wưng klei ruă tưp Covid-19 dôk dleh dưi ksiêm dlăng.

“Truh kơ ară anei, hmei ngă jih leh dŭm bruă mprăp kơ klei ruah khua hnưm, jih jang băng drol, boh blŭ, hră anăn phung mplĕ hră lehanăn phung mgơ̆ng asei dưi yuôl jih leh, bi leh wăt kơ huôm mplĕ hră. Bi leh bruă hiu mbha hră phung mplĕ hră kơ dŭm čô knuă druh, lĭng kahan hlăm kđông kahan. Êngao kơ năn, kyua klei ruă tưp Covid-19 dôk dleh dưi ksiêm dlăng, hmei mâo leh dŭm hdră êlan kjăp hŏng klei iêu mthưr kơ dŭm čô nai mdrao hlăm lĭng kahan ngă bruă krih êa drao mdjiê kman ti anôk ruah khua, êlâo kơ nao mplĕ hră srăng mkă hnơ̆ng hlơr asei, brei guôm ƀô̆ mta, dôk bi kbưi čiăng mâo klei êđăp ênang.”

Lĭng kahan răng mgang knông lăn čar Dak Lak dôk kriê dlăng knông lăn mâo boh taih êbeh 74 km, bi knông hŏng čar Muldunkiri, ala čar Campuchia. Tui hluê Theo đại tá Phạm Hữu Chiến- khua bruă kđi čar hlăm kđông kahan răng mgang knông lăn čar Dak Lak, kyua klei jing hlăm bruă mă, dưi mâo klei tŭ ư mơ̆ng êpul bruă ruah khua ala čar, 7 kđông lĭng kahan knông lăn lehanăn êpul mtô mjuăt lĭng kahan mjêč mơ̆ng êpul lĭng kahan knông lăn čar Dak Lak srăng mkŏ mjing klei ruah khua hnưm sa hruê.

Knông kahan răng mgang knông lăn Dak lak mâo 8 anôk ruah khua hnưm Quốc Hội gưl 15 lehanăn HĐND dŭm gưl wưng thŭn 2021-2026.

Đại tá Phạm Hữu Chiến lač, čiăng rơ̆ng kơ hruê ruah khua mâo klei êđăp ênang ăt msĕ hŏng bruă dưi rơ̆ng klei răng mgang ti knông lăn ala čar hlăm wưng klei ruă tưp Covid-19 dleh dưi ksiêm dlăng, anôk bruă bi mguôp leh hŏng dhar bruă ruah khua ti čar Dak Lak mkŏ mjing 8 êpul ruah khua ti 7 kđông lĭng kahan lehanăn êpul lĭng kahan mjêč mprăp kơ hruê ruah khua. Bruă ngă mprăp kơ hruê ruah khua hnưm dưi bi leh, mprăp kơ klei tŭ drông dŭm čô mplĕ hră hlăm dŭm anôk bruă.

“Hmei hrăm mbĭt hŏng bruă sang čư̆ êa hlăm alŭ wăl mkŏ mjing dŭm anôk ruah khua, mplĕ hră hlăm dŭm kđông lĭng kahan lehanăn anôk êpul mtô mjuăt lĭng kahan mjêč lehanăn bruă ngă dưi leh. Klei jing bruă mơ̆ng lĭng kahan knông lăn jing nao gak lehanăn răng mgang knông lăn, gang mkhư̆ klei găn knông lăn soh hŏng hdră bhiăn hlăm wưng klei ruă tưp Covid-19 dôk dleh dưi ksiêm dlăng. Hmei srăng mbha êpul lĭng kahan kơ dŭm anôk ruah khua, dŭm êpul dôk kbưi hŏng anôk ruah khua srăng mâo pô ba huôm mplĕ hră truh kơ anăn čiăng kơ dŭm čô knuă druh lehanăn êpul lĭng kahan dưi ngă klei dưi ruah khua djŏ hŏng hdră bhiăn.”

Bruă mprăp jăk dŭm mnơ̆ng dhơ̆ng yua, rơ̆ng kơ klei êđăp ênang, bruă mdrao mgŭn hlăm wưng klei ruă tưp Covid-19 dôk dleh ksiêm dlăng mơ̆ng lĭng kahan knông lăn čar Dak Lak lehanăn tơdah bruă ruah khua čar, mâo dŭm êtuh čô pô mplĕ hră “kă grat mtah” dôk ti knông lăn čar Dak Lak mprăp leh kơ hruê knăm prŏng, nao mplĕ hră lehanăn čuăn ruah dŭm čô bi ala kdlưn hĭn nao hgŭm hlăm Quốc Hội gưl 15 lehanăn HĐND dŭm gưl wưng thŭn 2021-2026.

Pô mblang: Y-Khem Niê