VOV4.Êđê - Ti anăp klei mâo dleh dưi ksiêm dlăng mơ̆ng klei ruă Covid 19 lehanăn huĭ hyưt klei ruă anei srăng bluh mâo lehanăn tưp lar ti krĭng knông lăn, êpul kahan răng mgang knông lăn dŭm čar krĭng Lăn dap kngư tiŏ nao leh lu êpul kahan hluê ngă hdră ksiêm dlăng, hiu suang, mjing wăl anôk răng mgang lehanăn mdrơ̆ng h’ĭt kjăp hŏng klei ruă tưp.

Kon Tum jing čar mâo êlan knông lăn taih hĭn ti alŭ wăl Lăn Dap Kngư, hŏng ênoh truh 292 km, găn hlăm 13 boh să ti 4 kdriêk, bi knông hŏng ala čar riêng gah jing Lào lehanăn Campuchia. Ară anei, êpul răng mgang knông lăn čar Kon Tum mâo 66 boh kđông gak, hŏng kluôm ênŭm ênoh lĭng kahan, tui ngă klei ksiêm dlăng hlăm knông lăn 24/24. Hlăm čar, êpul răng mgang knông lăn mâo klei nao hâo hưn kơ mnuih ƀuôn sang dôk hdĭp lehanăn mă bruă ti knông lăn kơ bruă mdrơ̆ng lehanăn gang mkhư̆ klei ruă tưp Covid-19, mbĭt hŏng anăn đru hlăm bruă gang mkhư̆ klei găn knông lăn soh hŏng hră bhiăn, hâo hưn, mtô mjuăt kơ dŭm čô knuă druh, lĭng kahan tui ngă djŏ hdră êlan 5 klei mtă, mâo nanao klei mprăp tơdah mâo klei bi mlih. Đại tá Lê Minh Chính, khua bruă Đảng, khua bruă kđi čar hlăm kđông lĭng kahan knông lăn čar Kon Tum brei thâo:“Hmei rơ̆ng kjăp dŭm anôk gak tuê êlan knông lăn, boh nik hlăm 2 nah băng jang knông lăn lehanăn dŭm êlan điêt, êlan hnoh. Bi mguôp hŏng êpul lĭng kahan răng knông lăn lehanăn dŭm êpul êya kahan ƀuôn mâo klei hrăm mbĭt hlăm bruă hiu ksiêm dlăng, mđĭ klei bi đru hdơ̆ng pô êjai mmông hiu ksiêm dlăng. Mbĭt hŏng anăn, hmei ăt gĭt gai jăk bruă hâo hưn kơ dŭm čô knuă druh, phung lĭng kahan lehanăn mnuih ƀuôn sang hlăm alŭ wăl jĕ knông lăn čiăng dưi mđĭ hĭn klei thâo săng, klei răng, amâo dưi ngă ngơi mang, luič klei răng hlăm bruă gang mkhư̆ klei ruă tưp, tui ngă djŏ hră êlan 5 klei mtă. Dưi ksiêm dlăng jih dŭm bruă ngă hlăm klei mŭt kbiă, hyuă kjăp hĭn dŭm bruă anăn.”

Ăt êjai mmông anei, tui ngă bruă klam tuê êlan knông lăn mbĭt hŏng čar Ratanakiri, ala čar Campuchia, hŏng sa ƀăng jang knông lăn lehanăn lu êlan điêt, êlan pŏk. Êpul răng mgang knông lăn čar Gia Lai ăt dưi rơ̆ng kơ 24 anôk gak, gang mkhư̆ klei ruă tưp Covid-19 tuê knông lăn. Hlăm anăn mâo 10 êpul hiu ksiêm dlăng ngă bruă klam wăt kơ hruê mlam čiăng gang mkhư̆ phung mnuih tlĕ găn knông lăn soh hŏng hdră bhiăn.

Bi kơ ƀăng jang knông lăn Lệ Thanh, kdriêk Đức Cơ, hŏng hdră êlan mdjiê kman lu gưl, mlih pô djă êdeh, êpul răng mgang knông lăn hrăm mbĭt hŏng êpul răng mgang klei mŭt kbiă ti ƀăng jang knông lăn, bruă mdrao mgŭn čiăng dưi rơ̆ng kơ bruă dŭ ba mnơ̆ng dhơ̆ng. hlăm lam čar, dŭm kđông kahan răng mgang knông lăn mâo klei bi mguôp hŏng phung khua mduôn hlăm ƀuôn, dŭm čô mnuih mâo klei đăo knang mơ̆ng mnuih ƀuôn sang dưi hâo hưn čiăng brei mdei dŭm bruă nao čuă găp djuê pô ti dua nah êlan knông lăn, mbĭt hŏng anăn srăng mâo klei kčŭt hưn dŭm êpul êya, mnuih ƀuôn sang ngă klei mdăp mnuih găn knông lăn soh hŏng hdră bhiăn.  Đại uý Phan Thanh Hà, k’iăng khua kđông kahan răng mgang knông lăn Ia O (knơ̆ng bruă gĭt gai kahan răng mgang knông lăn čar Gia Lai) dôk  ngă bruă klam ti kdrêk knông lăn Ia Grai brei thâo: “Kđông kahan răng mgang knông lăn Ia O dôk mâo sa anôk gak hlăm bruă gang mkhư̆ phung găn knông lăn soh hŏng hdră bhiăn, 1 anôk ksiêm dlăng lehanăn 1 êpul hiu ksiêm dlăng. Hrăm mbĭt hŏng dŭm anôk bruă djŏ tuôm nao hlăm bruă ksiêm dlăng ti alŭ wăl knông lăn, anôk bruă kđông kahan răng mgang knông lăn dôk kiă kriê, čiăng hmao ƀuh dŭm čô mnuih găn knông lăn soh hŏng hdră bhiăn lehanăn mâo dŭm hdră êlan gang mkhư̆ klei ruă tưp ti knông lăn, Dưm anôk bruă jing dôk ti klưn hĭn hlăm bruă gang mkhư̆ klei ruă tưp lehanăn tui ngă 5 mta klei mtă. Dưi rơ̆ng kơ ênoh knuă druh, lĭng kahan, mâo klei mprăp nanao.

Bi kơ čar Dak Lak mâo êlan knông lăn hŏng boh taih 74 km găn 2 kdriêk Ea Soup lehanăn kdriêk Ƀuôn Đôn, bi knông hŏng čar Mundulkiri, ala čar Campuchia. Thượng tá Nguyễn Minh Tuyên, k’iăng khua gĭt gai knơ̆ng bruă gĭt gai lĭng kahan răng mgang knông lăn čar Dak Lak brei thâo, ară anei, dŭm kđông kahan răng mgang knông lăn mâo klei mđĭ hĭn bruă hiu ksiêm dlăng, mâo klei gĭr jih ai tiê hlăm bruă gang mkhư̆ phung găn knông lăn soh hŏng hdră bhiăn ti 4 să, hlăm 2 kdriêk knông lăn. Hŏng ai tiê čŏng ngă lehanăn tui ngă djŏ dŭm hdră êlan ksiêm dlăng, hlăm dŭm hruê mmông leh êgao, êpul răng mgang knông lăn dưi hmao ƀuh lehanăn gang dŭm pluh čô găn knông lăn soh hŏng hdră bhiăn:“Hlăm wưng jing yan bhang, êlan klông êrô êbat 2 nah jing ênưih êdi, hmei kiă kriê nanao kơ 6 anôk gak čiăng ksiêm dlăng, 12 êpul hiu ksiêm dlăng 24/24, mă kơ̆ng dŭm čô mnuih găn knông lăn soh hŏng hdră bhiăn mơ̆ng Campuchia wĭt kơ Việt Nam. Hmei mtrŭt mjhar mnuih ƀuôn sang tui ngă djŏ dŭm hdră êlan ti knông lăn, amâo dưi găn knông lăn, tui ngă dŭm hdră êlan gang mkhư̆ klei ruă tưp, ksiêm dlăng kjăp dŭm čô mnuih găn knông lăn. Hlăm dŭm anôk mă bruă, hmei brei guôm ƀô̆ mta  hŏng čhiăm guôm ƀô̆ lehanăn tui ngă bi djŏ 5 mta klei mtă mŏng phŭn bruă mdrao mgŭn kơ bruă  gang mkhư̆ klei ruă tưp dưi mâo boh tŭ dưn.”

Hŏng klei gĭr jih ai tiê, mâo lu hdră êlan lehanăn mâo ai tiê mprăp nanao, čŏng ngă mơ̆ng pô, êpul răng mgang knông lăn ti dŭm êtuh km ti krĭng Lăn Dap Kngư dôk rŭ mjing sa boh mnư̆ mnang ƀăng jang kjăp čiăng gang mkhư̆ klei ruă tưp Covid-19, mkŏ mkra klei găl jăk hĭn kơ dŭm alŭ wăl dưi gang mkhư̆ klei ruă tưp lehanăn dưi hơĭt kơ dŭm bruă hlăm bruă duh mkra- ala ƀuôn.