VOV4.Êđê- Ti Kon Tum, hluê ngă klei gĭt gai mơ̆ng Knŭk kna lehanăn Phŭn bruă lĭng kahan, hdră gang mkhư̆ klei ruă Covid 19 ti krĭng knông lăn hlăm čar Kon Tum hlăk mâo êpul lĭng kahan răng mgang knông lăn mđĭ ktang hŏng lu hdră msir kñăm gang mkhư̆ klei ruă tưp bluh mâo ti alŭ wăl.

Ti alŭ wăl ƀăng jang knông lăn Bờ y, ti să Pơ Y, kdriêk Ngọc Hồi, čar Kon Tum mâo hlăm ƀrô êbeh 20 km knông lăn mbĭt hŏng 2 ala čar Lào lehanăn Campuchia mâo nanao klei hyưt kơ mnuih ƀuôn sang mơ̆ng 2 ala čar Lào lehanăn Campuchia srăng găn knông lăn soh hŏng hdră bhiăn. Ti anăp klei anăn, kđông kahan răng mgang knông lăn ti ƀăng jang knông lăn Bơ Y dưi mkŏ mjing 6 êpul êya, anôk ksiêm dlăng klei ruă tưp Covid-19 dôk sa anôk lehanăn thâo mđuê̆ hiu.

Knuă druh, lĭng kahan kđông răng mgang knông lăn ƀăng jang knông lăn Bờ  Y ksiêm dlăng gang mkhư̆ klei ruă Covid-19 ti knông lăn

Hlăm dŭm anôk ksiêm dlăng anei mâo 45 čô knuă druh, lĭng kahan knông lăn lehanăn dŭm êpul êya mnuih ƀuôn sang bi mlih hlăm klei hiu ksiêm dlăng hlăm knông lăn wăt kơ hruê lehanăn mmăt mlam. Thiếu tá Đoàn Xuân Trường, k’iăng khua êpul mtrŭt mjhar mnuih ƀuôn sang, kđông kahan răng mgang ti ƀăng jang knông lăn Bơ Y brei thâo, grăp čô knuă druh, lĭng kahan hlăm dŭm êpul, anôk ksiêm dlăng klei ruă tưp mâo nanao klei gĭr hlăm klei dleh dlan čiăng dưi bi leh bruă klam:

            “Hmei hruê mlam nao mbĭt hŏng dŭm êpul, anôk ksiêm dlăng lehanăn hiu ksiêm dlăng čiăng amâo mâo ôh pô tlĕ găn knông lăn lehanăn amâo mâo brei klei ruă tưp đĭ lar. Khădah dŭm čô ayŏng adei hlăm dŭm êpul, anôk ksiêm dlăng mâo klei dleh dlan, wăt kơ mnơ̆ng dhơ̆ng yua. Klei êrô êbat ăt dleh dlan ƀiădah dŭm čô ayŏng adei ăt mâo klei gĭr čiăng mgaih msir dŭm klei dleh dlan lehanăn dưi bi leh bruă klam.”

Hâo hưn mtô mblang gang mkhư̆ klei ruă Covid-19 kơ mnuih ƀuôn sang krĭng knông lăn mơ̆ng Kđông răng mgang knông lăn Quốc tế Bờ Y kriê dlăng

Mbĭt hŏng bruă srăng mđĭ hĭn klei ksiêm dlăng, gang dŭm čô mnuih mơ̆ng dua ala čar Lao lehanăn Campuchia găn knông lăn soh hŏng hdră bhiăn, kđông kahan răng mgang knông lăn ti ƀăng jang knông lăn Bơ Y ăt mâo klei mđĭ hĭn bruă hâo hưn, gang mkhư̆ klei ruă Covid-19 kơ phung tuê hiu čhưn ênguê lehanăn mnuih ƀuôn sang mâo lŏ hma giăm knông lăn. Dŭm čô lĭng kahan răng mgang knông lăn nao truh kơ grăp boh sang mnuih ƀuôn sang čiăng mtô kơ mnuih ƀuôn sang srăng guôm bô̆ mta tơdah nao pưk hma lehanăn tui ngă djŏ dŭm hdră êlan hlăm bruă gang mkhư̆ klei ruă tưp, amâo dưi găn knông lăn soh hŏng hdră bhiăn… boh tŭ dưn anei brei ƀuh kơ bruă dưi mđĭ klei thâo mơ̆ng mnuih ƀuôn sang kơ klei hyưt kyua klei ruă tưp Covid-19, grăp čô mnuih ƀuôn sang ti alŭ wăl knông lăn jing ală knga kơ êpul răng mgang knông lăn hlăm bruă bi mdrơ̆ng lehanăn gang mkhư̆ klei ruă tưp, răng mgang klei êđăp ênang ti knông lăn. Aduôn Nang Cứu, ti ƀuôn Iêc, să Pơ Y mâo pưk hma giăm knông lăn mbĭt hŏng ala čar Lào brei thâo:

 “Êjai mmông nao kơ pưk hma ti nei, mnuih ƀuôn sang mâo nanao klei hâo hưn mơ̆ng dŭm čô knuă druh ti knông lăn, tơdah mnuih ƀuôn sang hmao ƀuh mnuih amâo tuôm kral srăng hưn mthâo hŏng dŭm čô knuă druh anei.”

Trung tá Đặng Nguyên Hương, khua bruă Đảng, khua bruă kđi čar ti băng jang knông lăn Bơ Y brei thâo: dŭm čô knuă druh, lĭng kahan răng mgang knông lăn mâo klei sa ai amâo mâo brei klei ruă tưp Covid-19 srăng mâo klei đĭ lar.

            “Ti anăp klei dleh ksiêm dlăng mơ̆ng klei ruă tưp Covid-19 ti ala čar Campuchia lehanăn ala čar Lào, hmei mkŏ mkra leh dŭm hdră êlan ti knông lăn čiăng dưi thâo săng klă klei ruă tưp ti ala čar găp, lehanăn dưi mâo klei hâo hưn kơ mnuih ƀuôn sang, knuă druh, lĭng kahan ti nei srăng mâo klei thâo săng klă lehanăn tui ngă dŭm hră êlan čiăng mdrơ̆ng, gang mkhư̆ klei ruă tưp Covid-19. Mâo klei sa ai amâo mâo brei klei ruă tưp srăng mŭt hlăm êlan knông lăn truh kơ alŭ wăl lehanăn anôk bruă anei.”

Ti anăp klei dleh dưi ksiêm dlăng mơ̆ng klei ruă tưp Covid-19, mâo boh taih hlăm ƀrô 292 km êlan knông lăn mbĭt hŏng 2 ala čar Lào lehanăn Campuchia, êpul êya răng mgang knông lăn Kon Tum ară anei mâo 66 anôk ksiêm dlăng hŏng êbeh 400 čô knuă druh, lĭng kahan ti knông lăn dôk ngă 2 bruă klam sa blư̆ jing răng mgang klei êđăp ênang ti knông lăn lehanăn gang mkhư̆ klei ruă tưp Covid-19 dưi mâo boh tŭ dưn.

Pô mblang: Y-Khem Niê