VOV4.Êđê - Bi ti Lâm Đồng, lač dah bruă sang čư̆ êa ti alŭ wăl hlăk kpăk bruă gang mkhư̆ klei ruă Covid-19 leh anăn mprăp kơ klei ruah khua, klei duah mă mnơ̆ng hlăm gŭ lăn bluh mâo ti să Hiệp An, kdriêk Đức Trọng, čar Lâm Đồng. Amâo huĭ, ngă mdăp, duah mă hlăm mlam leh anăn hruê mdei knhal jih hruê kăm msĕ êlâo ôh, kuai mă lăn, boh tâo soh hŏng hdră bhiăn ngă hlăm grăp hruê, mâo anôk knŏng kbưi mă hŏng Knơ̆ng bruă sang cư̆ êa să dŭm êtuh met.

Ti čuê lăn bruă lŏ hma mrô 283, hlăm hla kak rup lăn 6A, ti djiêu đăng hngô mtah siam, mâo dŭm êbâo m³ lăn lehanăn boh tâo dưi mâo klei ba mđuê̆ čhĭ kơ anôk mkăn. Hlăm anôk anăn, bruă mă ba mđuê̆ anei ăt mâo klei mjhĭt m’uăt, ngă kơ tar alŭ wăl jing sa anôk mă bruă prŏng. Leh hmei nao truh kơ anăn, dŭm boh êdeh prŏng, kdrăp ktar boh tâo lehanăn lu mnuih mă bruă hlăm anăn êran đuê̆ mtŭk mtŭl. Bhiâo riâo rĭt, knŏng adôk mă sa boh êdeh kčao prŏng amâo mâo ƀuh pô mgăt ôh.

Anôk mă boh tâo soh hŏng hdră bhiăn anei mâo leh lu mlan êgao, giăm hlăm anôk mnuih ƀuôn sang dôk, mâo boh taih hlăm ƀrô ka truh 2km hŏng anôk bruă sang čư̆ êa să, ƀiădah bruă sang čư̆ êa să Hiệp An knŏng nao đŭ mă sa blư̆ kyua ngă soh hŏng hdră bhiăn knŭk kna khă bi leh bruă hlăm hruê 27/4. Uông Thanh Hải, pô ngă bruă ksiêm mkă lăn ti să Hiệp An lač, bi kơ bruă amâo dưi hmao ƀuh dŭm klei ngă soh anăn, kyua dŭm čô anei ngă bruă hŏng klei tlĕ lehanăn êpul êya knuă druh hlăm să dôk mâo lu bruă knuă yuôm bhăn mkăn: “Hmei mâo knŏng ƀiă mnuih, kyuanăn amâo dưi ksiêm dlăng ôh dŭm bruă kčao, kuai lăn, lehanăn bruă mă mđuê̆ boh tâo soh hŏng hdră bhiăn. Klă klơ̆ng bruă anei jing êgao hnơ̆ng kơ hmei. Êngao kơ năn, tơdah hmei nao hlăm anăn, diñu ba mđuê̆ leh êdeh êdâo, amâo dưi mâo mă ti mmông anăn mtam ôh, amâo dưi mâo ôh klei bi mklă čiăng mgaih msir dŭm klei mă mđuê̆ mnơ̆ng dhơ̆ng mơ̆ng lăn soh hŏng hdră bhiăn anăn.”

Bi kơ knuă druh bruă ksiêm dlăng mplĕ klei anei kyua mơ̆ng tač êngao, ƀiădah hlăm sa anôk giăm êlan dơ̆ng mrô 20, mâo boh taih hŏng anôk bruă sang čư̆ êa să Hiệp An dŭm êtuh met ăt mâo klei msĕ sơnăn mơh. Dŭm boh êdeh kčao prŏng amâo mâo klei huĭ hlăm bruă kčao, kuai lăn, mă mđuê̆ boh tâo soh hŏng hdră bhiăn ti krah yang hruê dơ̆ng, ƀiădah dah anôk bruă sang čư êa kăn thâo lei. Truh kơ hruê hmei nao mdah rup lehanăn mâo klei êmuh, anôk bruă mă mđuê̆ mnơ̆ng dhơ̆ng mơ̆ng lăn anei mâo mơh klei brei amâodah hơăi, bruă sang čư̆ êa să Hiệp An srăng mâo klei dưi mkŏ mjing êpul êya nao ksiêm dlăng, bi mklă bruă ngă soh hŏng hdră bhiăn lehanăn ngă hră mơar čiăng mgaih msir bruă ngă soh hŏng hdră bhiăn knŭk kna.

Hồ Hữu Hiếu, khua bruă sang čư̆ êa să Hiệp An mñă klă, bruă sang čư̆ êa să amâo mâo tuôm ngă klei ngơi mang amâodah luič klei răng, ƀiădah amâo lŏ thâo mgaih msir kơ bruă kčao mă lăn, mă mđuê̆ boh tâo soh hŏng hdră bhiăn. Hồ Hữu Hiếu lač, boh phŭn mâo klei anei kyua alŭ wăl jing prŏng êdi, lăn cư̆ čhiăng troh trôk dleh dưi ksiêm dlăng, dŭm čô ngă bruă anei kreh mă hlăm dŭm hruê mdei, mlam mmăt kyuanăn dleh êdi dưi hmao ƀuh. Ƀiădah Hồ Hữu Hiếu ăt lač, să srăng mâo klei lŏ ƀư̆ mkra. “Hruê mmông leh êgao, bruă sang čư̆ êa să dưi mgaih msir leh lu klei ngă soh hŏng hdră bhiăn. Khădah, kyua să Hiệp An jing alŭ wăl prŏng êdi, anôk čư̆ čhiăng troh trô̆k dleh kơ klei ksiêm dlăng, dŭm čô ngă klei soh mčhua hlăm dŭm hruê mdei, mmông mdei, mmăt mlam hlăm bruă mă mđuê̆ mnơ̆ng dhơ̆ng mơ̆ng lăn. Hlăm hruê mmông kơ anăp, să Hiệp An srăng ngă kjăp bruă mgaih msir dŭm klei ngă soh anăn, lŏ mkŏ wĭt klei êđăp ênang hlăm boh klei kčao, kuai lăn, ăt msĕ si bruă mă mđuê̆ boh tâo soh hŏng hdră bhiăn hlăm alŭ wăl.”

Srăng ngă kjăp bruă mgaih msir čiăng krŭ wĭt klei êđăp ênang, anei jing klei bi mklă mơ̆ng khua kiă kriê bruă sang čư̆ êa să Hiệp An, kdriêk Đức Trọng, čar Lâm Đồng ăt brei ƀuh, êlâo dih klei kriê dlăng mơ̆ng bruă sang čư̆ êa ka mâo klei kjăp ktang ôh. klei anei dưi mblang kơ boh klei mă boh tâo soh hŏng hdră bhiăn ti anôk anei, ăt jing msĕ si sa klei lông dlăng kơ jih jang mnuih lehanăn klei bhiăn knŭk kna.