VOV4.Êđê - Anôk bi ala kơ ala čar Việt Nam ti ala čar Lào mrâo mâo sa klei hưn mthâo kơ bruă mdei klei brei kơ dŭm čô mnuih mơ̆ng ala čar Lào wĭt kơ Việt Nam truh kơ jih hruê 30/05/2021. Ti anăp klei mrâo dŭm hruê leh êgao, mâo đa đa mnuih ƀuôn sang mâo klei akâo dưi wĭt kơ ala čar Việt Nam ƀiădah mâo klei kăm ghă hlăm dŭm băng jang knông    lăn, pô bi ala kơ ala čar Việt Nam ti ala čar Lào brei thâo: bruă anei tui ngă klei mtrŭn mơ̆ng adŭ bruă knŭk kna ala čar yang ƀuôn ngă phŭn Việt Nam kơ bruă Mdei klei brei mnuih mơ̆ng ala čar Ấn Độ, Thailand, Campuchia, Lào wĭt kơ ala čar Việt Nam truh kơ jih hruê 30/5/2021. Dŭm čô mâo leh klei ngă hră êlâo kơ hruê 28/4/2021 ăt mâo klei brei tui hluê klei bhiăn. Bi kơ dŭm klei akâo mŭt hlăm ala čar mkăn, čiăng akâo klei tŭ ư mơ̆ng phŭn bruă hŏng tač êngao Việt Nam lehanăn tui ngă djŏ hdră bhiăn mơ̆ng phŭn bruă mdrao mgŭn. Pô bi ala kơ ala čar Việt Nam ti ala čar Lào mñă kơ mnuih ƀuôn sang Việt Nam dôk hdĭp mda, mă bruă lehanăn dôk hriăm ti ala čar Lào srăng tui ngă djŏ dŭm klei bhiăn mơ̆ng ala čar Lào lehanăn Việt Nam kơ bruă gang mkhư̆ klei ruă tưp Covid-19. Amâo đuê̆ kbưi mơ̆ng anôk pô dôk tơdah amâo mâo bruă mjêč, amâo dưi nao kơ dŭm băng jang knông lăn tơdah ka mâo klei brei wĭt kơ ala čar, ngă klei dleh dlan kơ dŭm êpul êya dôk ngă bruă klam.

Y Khem pô mblang