VOV4.Êđê- Aguah anei 15/4, ti Hà Nội, phŭn bruă lŏ hma leh anăn krĭng ƀuôn sang mkŏ mjing leh klei bi trông kơ bruă Mđĭ klei mă bruă mơ̆ng dŭm kdrăp hlăm bruă rông mnơ̆ng dhơ̆ng dŭm gưl wưng thŭn 2021-2030. Trông kơ dŭm hdră êlan čiăng gang mkhư̆ klei ruă mđuič bŏk êngao klĭt mơ̆ng ŭn, êmô. Bruă kñăm mbĭt mơ̆ng hdră êlan hlăm wưng thŭn 2021-2030 jing mđing truh kơ klei kluôm ênŭm, hyuă kjăp leh anăn Mđĭ klei mă bruă mơ̆ng dŭm kdrăp hlăm bruă rông mnơ̆ng dhơ̆ng dưi mâo klei jăk, boh tŭ dưn leh anăn dưi ksiêm dlăng klei ruă tưp kơ mnơ̆ng rông, rơ̆ng kơ klei suaih prar anak mnuih hlăm yang ƀuôn leh klei dưi añŭ kma hŏng tar rŏng lăn. Tuôm hŏng bruă gang mkhư̆ klei ruă mđuič bŏk êngao klĭt hlăm ŭn, êmô, tui hlue klei bi mklă mơ̆ng anôk bruă rông mnơ̆ng dhơ̆ng, phŭn bruă lŏ hma leh anăn krĭng ƀuôn sang, klei ruă ăt dôk tưp lar hlăm lu alŭ wăl. Truh kơ ară anei, klei ruă anei mâo leh hlăm 781 să, 125 kdriêk hlăm 25 čar ti kluôm ala.

                                                    Pô mblang: H’Nêč Êñuôl