VOV4.Êđê- Tlam hruê 28/3, Klei bi kƀĭn trực tuyến kluôm ala bruă ksiêm dlăng, tui hriăm, hluê ngă Hdră mtrŭn Klei bi kƀĭn tal 13 mŏng Đảng mjưh ruê̆ jăk siam leh 2 hruê mă bruă tŭ dưn. Blŭ hrăm mjưh ruê̆ klei bi kƀĭn, Khua hlăm bruă Đảng gưl dlông, Khua anôk bruă kiă kriê klei hâo hưn gưl dlông Nguyễn Trọng Nghĩa mñă klă, Klei bi kƀĭn tal anei mâo lu klei mlih mrâo hlăm hdră mprăp, hdră mkŏ mjing, phung hưn mdah jing phung khua kiă kriê knơ̆ng mŏng Đảng, Knŭk kna mtô mblang leh klă klơ̆ng kơ Hdră mtrŭn, đru mđĭ hnơ̆ng tŭ jăk hdră tui hriăm Hdră mtrŭn. Khua hlăm bruă Đảng gưl dlông, Khua anôk bruă kiă kriê klei hâo hưn gưl dlông Nguyễn Trọng Nghĩa brei thâo, hŏng êbeh 7.400 anôk bruă ti gưl nah gŭ. Mâo giăm 1 êklăk čô Đảng viên hlăm kluôm ala dưi tui hriăm kjăp Hdră mtrŭn, jing 5 – 6 čô Đảng viên mâo 1 čô nao hriăm hlăm gưl anei hŏng ai tiê mjêč./.

Pô mblang: H’Nêč Êñuôl