VOV4.Êđê - Knơ̆ng bruă mnuih ngă bruă Việt Nam mrâo mkŏ mjing leh Klei bi kƀĭn trông trực tuyến pŏk ngă Mlan mnuih ngă bruă thŭn 2021 hŏng anăn ‘’Hgŭm mguôp, mĭn mrâo, hgao klei dleh dlan, đĭ kyar’’. Kyua hmăi mơ̆ng klei ruă Covid 19, kyua anăn lu anôk bruă duh mkra, êpul êya bruă lehanăn phung đoàn viên, mnuih mă bruă hmăi djŏ. Mmông anei, dŭm êklăk čô mnuih mă bruă hlăm kluôm ala čar brei bi hgŭm mguôp, mĭn mrâo čiăng hgao klei dleh dlan ti anăp lehanăn maoa ai tiê gỉr ktưn kpưn đĭ, mâo klei čang hmăng mđĭ kyar kyua klei yâo m’ak kơ pô, kơ gŏ sang, lŏ krŭ wĭt, mđĭ kyar anôk bruă duh mkra lehanăn klei sah mdrŏng kơ lăn čar.

Kyua anăn, Mlan mnuih ngă bruă thŭn anei mâo anăn ‘’Hgŭm mguôp, mĭn mrâo, hgao klei dleh dlan, đĭ kyar’’. Sa hlăm dŭm bruă phŭn mơ̆ng mlan mnuih ngă bruă thŭn anei jing Hdră bruă ‘’75 êbâo klei mĭn mrâo, hgao klei dlen dlan, đĭ kyar’’. Ênoh 75 êbâo klei mĭn mrâo hŏng klei čang hmăng mnuih ngă bruă Việt Nam srăng hdơr, mpŭ, bi lar bra hĭn ai tiê Hruê Quốc tế mnuih ngă bruă ti Việt Nam sui hŏng anei 75 thŭn dưi mkŏ mjing mitting kdrăm k’ah ti ƀuôn prŏng phŭn Hà Nội. Mbĭt anăn kkuh m’ak 75 thŭn Hruê ruah khua kluôm tal êlâo mơ̆ng ala čar Việt Nam yang ƀuôn ngă phŭn./.

H’Nêč pô mblang