VOV4.Êđê - Dŭm mlan êgao, mnuih ngă lŏ hma ti djiêu 2 nah hang krông Dă Ñim, kdrêč găn să Lạc Xuân, kdriêk Đơn Dương (Lâm Đồng) lĕ hlăm klei dleh dlan kyua phŭn mkăp êa krih kơ mnơ̆ng pla čhŏ djhan kjham êdi. Mâo lu ênhă djam mtam luič boh mnga kyua krih êa čhŏ, êkăl plŭk kyua klei kuai mă čuah ngă.

Khă gơ̆ mprăp leh djăp ênŭm klei găl čiăng êdi pioh pla mjing yan djam sa lát mrâo, ƀiă dah êbeh 10 hruê êgao, gŏ sang amai Nguyễn Thị Lành, ti alŭ Diom B, să Lạc Xuân, kdriêk Đơn Dương ăt dôk guôn, amâo jhŏng pla mjeh kyua huĭ luič liê. Mta phŭn jing kyua êa krih mă mơ̆ng êa krông Dă Nhim êkăl, mâo mmông bŏ lăn hlŭ kyua bruă mă čuah mơ̆ng sa anôk bruă mnia blei krah êa krông mtam. Hluê si amai Lành, bruă pla djam tam dŭn mta, boh nik, djam brei đŭng, sa lat, djam brei prêñ… brei mâo êa doh, tơdah krih êa čhŏ leh anăn mâo lăn lŭ snăn msĕ si luič liê lu kơ bruă duh mkra.“Mprăp pla yan anei mâo 1,3 ha sa lat, ƀiădah êa êkăl snăn djam tam srăng djiê. Pla djam sa lat 2 truh 3 hruê kăm mphŭn đŭng hla, tơdah krih êa anei djam srăng jŭ jih, hmei srăng luič liê mang.”

 Bruă hiu mă čuah ngă kơ êa krông Dă Nhim êkăl, čhŏ djan hmaĭ truh kơ bruă mkra mjing mơ̆ng lu mnuih ƀuôn sang alŭ wăl. Hluê si aduôn Phan Thị Cấp, ti alŭ La Bouye A, să Lạc Xuân, khă gơ̆ êa amâo rơ̆ng doh ôh ƀiădah mnuih ƀuôn sang ăt krih kơ ana pla mjing kyua amâo mâo ôh êa mkăn. Mâo leh lu ênhă djam tam jhat rai, ama pla mjing êmưt prŏng kyua êa krih êkăl. Tơdah boh klei anei lŏ dơ̆ng sui srăng ngă kơ lu ƀĭng ngă lŏ hma lĕ hlăm klei dleh dlan, hlăm anăn mâo gŏ sang ñu:“Pla djam bei đŭng krih êa êkăk snăn hlăm lam jing jŭ, dleh dlan snăk. Hdĭp hlăm êa krông Dă Nhim anei snăn knŏng jưh knang êa mơ̆ng êa krông Dă Nhim yơh. Yan êlâo snăn êa lip êngăp jih, bi yan anei tuh êyuh ai tiê mkra mjing snăn amâo lŏ mâo êa krih.”

Dă Nhom jing êa krông prŏng đoh dăn lu să, wăl krah ti kdriêk Lạc Dương leh anăn sa kdrêč kdriêk Đức Trọng, anôk mkăp êa krih phŭn kơ bruă ngă lŏ hma kơ krĭng pla djam tam phŭn ti čar Lâm Đồng. Klei năng lač, wưng anei jing yan không, hnơ̆ng êa hlăm êa Krông Dă Nhim ƀiă, ƀiă dah anôk bruă mă čuah jing knơ̆ng bruă Lê Văn Oai Lâm Đồng (anôk bruă ti kdriêk Đơn Dương) ba nao leh 2 hô̆ mran prŏng čiăng mă čuah ba ti hang. Êa hlŭ amâo dưi msir mgaih, êa leh kar anôk bruă anei mđoh wĭt hlăm êa krông, ngă kơ êa krông êkăl, êkŏ.

Dưi thâo, Knơ̆ng bruă Lê Văn Oai Lâm Đồng mâo čar Lâm Đồng mkăp brei hră dưi mă čuah ti nei hlăm ênhă êbeh 11 ha, jing ktuê sa kdrêč êa krông Dă Nhim mâo boh dlông giăm 6 km. Wưng mphŭn mă jing hruê 30/11/2020 leh anăn wưng kčah sui truh 14 thŭn 5 mlan. Hoàng Công Hiếu, Khua adŭ bruă ngăn dŏ wăl hdĭp mda kdriêk Đơn Dương brei thâo, bruă knơ̆ng bruă anei duah mă čuah ngă čhŏ djhan kơ êa, hmaĭ truh kơ bruă pla mjing lŏ hma mơ̆ng ƀĭng ngă lŏ hma jing sĭt. Hlăm wưng kơ anăp, tơdah klei anei amâo mâo anôk bruă duh mkra mnia blei msir mgaih snăn srăng brei mdei bruă mă čuah anei. “Hlăm hdră mă čuah brei rơ̆ng hnơ̆ng êa kơ mnuih ƀuôn sang krih kơ ana pla mjing. Khădah, truh mmông anei, mơ̆ng klei mnuih ƀuôn sang lač snăn êa krih ăt ka dưi ba yua. Kyua anăn, anăp truh kdriêk hŏng Adŭ bruă ngăn dŏ wăl hdĭp mda srăng ksiêm dlăng leh năn brei anôk bruă duh mkra mnia blei brei msir mgaih bi jih. Tơdah amâo msir mgaih snăn srăng mjưh mdei bruă mă čuah mơ̆ng Lê Văn Oai”.

Amâo djŏ knŏng êa čhŏ djhan kjham ôh, bruă mă čuah mơ̆ng Knơ̆ng bruă Lê Văn Oai Lâm Đồng ngă kơ lu kdrêč hang krông Dă Nhim klưh hroh, huĭ dah srăng klưh lăn hnơ̆ng prŏng hlăm yan hjan êa lip anăp truh. Êngao anăn, hlăm hdră ngă bruă mă čuah, knơ̆ng bruă anei čŏng gang êlan êa đoh ti krah êa krông, mbĭt anăn ka dưi ngă djăp ênŭm dŭm klei ƀuăn rơ̆ng hluê si klei kčah mtrŭn mơ̆ng hdră bhiăn, hlăm anăn mâo bruă amâo mkŏ dưm anôk mkă ti anôk ba ngăn dŏ hlăm gŭ lăn kbiă mơ̆ng krĭng wăl, amâo mkŏ dăp camera ti krĭng wăl mâo čuah čiăng kriê pioh klei hâo hưn…