VOV4.Êđê- Tlam hruê 27/4, hlăm hdră mă bruă mơ̆ng Êpul bruă mnia mblei tar rŏng lăn WTO, bruă ksiêm dlăng Hdră mtrŭn bruă mnia mblei tal 2 mơ̆ng Việt Nam mâo leh Phŭn bruă Tuh tia mnia mblei mkŏ mjing hluê hdră trực tuyến. Bi ala Êpul Việt Nam, Trần Quốc Khánh – K’iăng khua phŭn bruă tuh tia mnia mblei hưn mdah leh dŭm boh tŭ êdah kdlưn mơ̆ng Việt Nam mơ̆ng leh bruă ksiêm dlăng hdră mtrŭn bruă mnia mblei gưl tal êlâo hlăm thŭn 2013, mbĭt anăn mñă klă klei gĭr lŏ dơ̆ng ñŭ kma kluôm dhuôm, êlam, mkra mlih bruă duh mkra ăt msĕ mơh hluê ngă kjăp dŭm klei leh ƀuăn rơ̆ng. Ti anôk bi kƀĭn, bi ala phung khua hlăm WTO ăt bi mni klei đĭ kyar mơ̆ng hdră bruă duh mkra Việt Nam, mbĭt anăn ba mdah dŭm klei êmuh čiăng kơ pô bi ala Việt Nam wĭt lač msĕ si: Kơ wăl anôk bruă duh mkra Việt Nam, klei bhiăn bruă mnia mblei lehanăn duh bi liê, hdră mtrŭn bruă mnia mblei kčah mtrŭn hlăm bruă mŭt kbiă, klei kơ prăk jia, răng mgang bruă mnia mblei, dưn yua klei mĭn mrâo, hdră mtrŭn mđĭ kyar dŭm hdră bruă phŭn msĕ si bruă lŏ hma, mnơ̆ng hlăm êa, bruă pui kmlă, bruă tuh tia mkra mjing, êlan klông dŭ mdiăng, bruă hâo hưn êlan kbưi...

                                                    Pô mblang: H’Nêč Êñuôl