VOV4.Êđê- Aguah hruê 27/4, ti Sang Quốc hội, mphŭn pŏk leh Klei bi kƀĭn tal 55 mơ̆ng Dhar bruă gĭt gai Quốc hội. Mkŏ mjing hlăm 1 hruê, klei bi kƀĭn anei, Dhar bruă gĭt gai Quốc hội srăng brei klei blŭ tal êlâo kơ bruă mprăp kơ Klei bi kƀĭn tal sa, Quốc hội gưl XV. Dhar bruă gĭt gai Quốc hội ksiêm dlăng, bi mklă kơ hdră ba yua miêt mkriêm kơ ênoh bi liê lehanăn phŭn mkăp ngăn prăk adôk mơ̆ng gưl dlông hlăm thŭn 2020. Tĭng dlăng boh tŭ Klei bi kƀĭn tal 11, Quốc hội gưl 14 lehanăn brei klei blŭ tal êlâo kơ bruă mprăp kơ Klei bi kƀĭn tal sa, Quốc hội gưl XV. Ksiêm dlăng, bi mklă bruă lŏ dơ̆ng ba yua phŭn mkăp ênoh duh bi liê adôk mơ̆ng Hdră mtrŭn mrô 324 mơ̆ng Dhar bruă gĭr gai Quốc hội gưl 14 čiăng duh bi liê mkŏ mkra dŭm hdră bruă mơ̆ng Anôk bruă bi ala Việt Nam ti ala tač êngao wưng thŭn 2021-2025. Ksiêm dlăng, bi mklă bruă thiăm mbŏ ênoh prăk lŏ blei vaccine, êa drao mdjiê kman lehanăn mjeh mnơ̆ng pla mơ̆ng ala čar. Ăt ti anôk bi kƀĭn tal anei, Dhar bruă gĭt gai Quốc hội ksiêm dlăng, bi mklă leh bruă mkŏ mjing, mkra mlih krĭng lăn dŭm êpul êya ngă hră m’ar ti 5 čar, ƀuôn prŏng mâo: Hà Nội, Thừa Thiên Huế, Thanh Hóa, Đồng Nai, Tuyên Quang.

                                                    Pô mblang: H’Nêč Êñuôl