VOV4.Êđê -  Tur gơ̆ng pui kmlă tal êlâo hlăm ênoh 28 tur ti Sang maĭ pui kmlă êran hŏng angĭn Dak Ndrung 1, mâo hnơ̆ng 50MW dưi tuh bê tông hlăm nmăt hruê 30-3. Anei jing 1 hlăm 6 hdră bruă mđĭ kyar pui kmlă êran hŏng angĭn mâo Knơ̆ng bruă sang čư̆ êa čar Dak Nông bi mklă dưi rŭ mdơ̆ng. Mlan 10/2020, 6 hdră bruă pui kmlă êran hŏng angĭn mâo Knơ̆ng bruă sang čư̆ êa čar Dak Nông tŭ ư duh bi liê. Ênoh hnơ̆ng mơ̆ng bruă anei mâo 430 MW, dưi pŏk ngă ti kdriêk Dak Song, alŭ wăl dưi lač mâo klei găl čiăng mđĭ kyar mta pui kmlă anei. Ênoh duh bi liê mĭn tĭng mơ̆ng 6 mta bruă mrâo lač giăm 15 êbâo êklai prăk. Mĭn tĭng truh knhal jih thŭn 2021, jih 6 mta bruă dưi ngă bruă, srăng đru mkăp pui kmlă kơ êlan pui kmlă ala čar, ăt msĕ mơh mđĭ hnơ̆ng hơĭt kjăp kơ kdrăp pui kmlă čar Dak Nông.

H Zawut pô mblang