VOV4.Êđê- Hluê si klei hưn, mtô bi ktưn PCI thŭn 2020 mơ̆ng Adŭ bruă mnia mblei Việt Nam hưn, 4 hlăm ênoh 5 čar krĭng lăn dap kngư hrŏ mkă hŏng thŭn 2019. 3 čar Lăn dap kngư dôk hlăm êpul man dưn thŭn 2019, mâo 2 čar dôk ti êpul ƀiă. 3 čar Lăn dap kngư mâo mrô bi ktưn dôk hlăm êpul man dưn thŭn 2019 mâo Lâm Đồng, Gia Lai leh anăn Dak Lak, snăn hlăm thŭn anei, knŏng mâo Lâm Đồng dưi krơ̆ng dôk hlăm êpul anei, khă hrŏ leh 1,8 puăng. Dak Lak lehanăn Gia Lai, hnơ̆ng hrŏ jing 1,59 lehanăn 2,22 puăng, trŭn ti êpul ƀiă. Ti Gia Lai, mta phŭn kbiă hriê kyua ênoh đru mơ̆ng anôk bruă duh mkra hrŏ lehanăn ênoh mjuăt bi hriăm mnuih mă bruă trŭn. Ăt hluê si klei hưn mrô bi ktưn gưl čar thŭn 2020, Lăn dap kngư amâo mâo čar dôk hlăm êpul ‘’ƀiă hĭn’’, ƀiădah mâo 2 čar dôk dŭm čar ti tluôn hĭn hlăm êpul man dưn. Hlăm anăn, čar Dak Nông, sa boh čar ti lăn dap kngư đĭ puăng mkă hŏng thŭn 2019, hŏng hnơ̆ng đĭ 1,46 puăng, ƀiădah ăt dôk ti tluôn hlăm krĭng dŭm ala čar mâo ênoh mrô bi ktưn ƀiă mơ̆ng kluôm ala./.

                                                    Pô mblang: H’Nêč Êñuôl