VOV4.Êđê- Êpul ngă bruă mŏng Phŭn bruă lĭng kahan mâo Trung tướng Phùng Sĩ Tấn, K’iăng khua đru kčĕ Lĭng kahan yang ƀuôn Việt Nam ngă khua êpul nao čuă, mă leh bruă hŏng Anôk bruă sang čư̆ êa čar kơ hdră msir mghaih anôk ala Hdră mkra êlan Trường Sơn Ngŏ kdrêč găn ti čar Dak Lak. Hdră mkra êlan Trường Sơn Ngŏ kdrêč găn ti čar Dak Lak mâo boh taih 126 km. Truh ară anei, hdră anei ngă leh mbĭt anăn ba jao leh 52 km. Thŭn 2020, pŏk hdră hluê ngă 13 hdră bruă. Khă snăn, kyua hmăi mơ̆ng hdră msir mghaih anôk ala kyua anăn dŭm mta bruă ti alŭ wăl êmưt hluê ngă. Ti anôk mă bruă, Trung tướng Phùng Sĩ Tấn mtă kơ phung khua kiă kriê čar Dak Lak mđing dlăng, gĭt gai dŭm anôk bruă djŏ tuôm bi hgŭm kjăp hŏng Anôk kriê dlăng hdră bruă kñăm mtrŭt mđĭ klei ngă hră m’ar, hdră msir mghaih anôk ala, hdră hluê ngă bruă. Phung khua kiă kriê anôk bruă sang čư̆ êa čar mñă srăng mjing djăp klei găl čiăng kơ hdră anei dưi hluê ngă djŏ hdră kčah, bi mklă anei jing sa klei găl čiăng kơ alŭ wăl mđĭ kyar bruă duh mkra – ala ƀuôn mguôp hŏng bruă răng mgang klei êđăp ênang./.

Pô mblang: H’Nêč Êñuôl