VOV4.Êđê- Giăm 10 thŭn siă suôr hŏng bruă mtô bi hriăm ti sang hră bruă kđi čar ti čar Dak Lak ăt jing dŭm năn thŭn ayŏng Phạm Văn Dương siă suôr hŏng bruă êdam êra hlăm nah gŭ. Amâo djŏ knŏng mâo lu klei tŭ hlăm bruă knuă, ayŏng Dương lŏ jing sa čô knuă druh hur har, jih ai tiê, mâo lu klei đru mguôp kơ  bruă êdam êra.

Dŭm hruê anei hlăk jing Hruê phung êdam êra, khădah amâo mâo mmông wăn kyua dôk mtô ti Adŭ mtô bi hriăm kơ bruă mkŏ mkra Đảng, Sang hră ksiêm hriăm kơ bruă kđi čar čar DakLak, Thạc sĩ Phạm Văn Dương ăt hur hai jih ai tiê hŏng bruă đoàn. Ayŏng Phạm Văn Dương lač, hdră mtô bi hriăm, ksiêm kơ bruă kreh knhâo luič lu hruê mmông, kyua anăn ñu kreh hnêč mmông wăt hlăm knhal jih hruê kăm čiăng nao hgŭm hlăm bruă Đoàn. Khă snăn, kyua khăp snăk kơ bruă đoàn dơ̆ng mơ̆ng hlăk sinh viên, ayŏng Dương nao hgŭm leh hlăm lu bruă Đoàn msĕ si: Bruă Yan mnga ba anăp, bruă yan bhang mtah, myơr êrah, nao čuă mđup brei mnơ̆ng kơ mnuih ƀuôn sang ti krĭng dleh dlan.

Mơ̆ng thŭn 2013, leh wĭt mă bruă ti Sang hră ksiêm hriăm kơ bruă kđi čar, mbĭt hŏng bruă phŭn mơ̆ng pô, ayŏng lŏ nao hgŭm hlăm bruă Đoàn lehanăn dưi ruah jing K’iăng kriê dlăng bruă Đoàn sang hră, mbĭt anăn ñu lŏ jing K’iăng khua bruă Đoàn êpul dŭm anôk bruă duh mkra čar Dak Lak. Hŏng k’hưm ya bruă, ayŏng Dương mâo nanao klei mĭn mrâo, hdră ngă bruă djŏ guôp kñăm mtrŭt mđĭ bruă đoàn.

“Mơ̆ng bruă đoàn đru leh kơ kâo đĭ hriê kơ prŏng. Dơ̆ng mơ̆ng hruê wĭt ti sang hră anei, kâo pô mâo nao hgŭm leh hlăm lu mta bruă, si tô hmô mâo klei ruă tưp Covid 19 ti alŭ wăl, kâo ăt čih mkra hdră kčah lehanăn mtrŭt mjhar dŭm anôk bruă đoàn nah gŭ mkra ală kĭng gang êa kbah kdah lehanăn mtrŭt mjhar anôk bruă duh mkra đru kơ hdră gang mkhư̆ klei ruă, boh nik đru kơ phung nai aê mdrao.

Ayŏng Phạm Văn Dương hnêč mmông ksiêm hriăm hră mơar hlăm sang dlăng hră

        Amâo djŏ knŏng mâo lu klei mĭn mrâo hlăm bruă Đoàn, ayŏng Phạm Văn Dương ăt mâo lu klei mĭn mrâo hlăm bruă phŭn pô, nao ksiêm hriăm kơ bruă kreh knhâo. Jing sa čô nai mtô mda asei, kkiêng thŭn 1989, ƀiădah dơ̆ng mơ̆ng hruê păn bruă truh ară anei, ayŏng Dương mâo leh 4 hdră ksiêm duah bruă kreh knhâo dŭm gưl, 2 klei čih bi trông gưl quốc tế lehanăn êbeh 30 klei čih dưi kđăm mkra hlăm hră klei mrâo. Lu klei mĭn mrâo mơ̆ng ñu dưi ba yua hlăm klei mâo sĭt lehanăn ba wĭt boh tŭ dưn. Mrâo anei, Phạm Văn Dương lŏ nao hgŭm hlăm Hdră mtrŭt mjhar Ba myơr klei thâo pô hlăm bruă mkŏ mkra lehanăn mđĭ kyar čar Dak Lak mdrŏng sah, kreh dhar hŏng akŏ Čuăl mkă mđĭ kyar bruă tuh tia mkra mjing mguôp hŏng bruă rơ̆ng kjăp klei êđăp ênang ala čar. Klei čih anei dưi tŭ yap lehanăn ba hlăm hdră kčah čuăl mkă hlăm wưng ti anăp.

“Hlăm klei čih kâo anăn, mâo sa mta bruă kâo hưn mdah anăn jing si srăng ngă hlăm hdră čuăl mkă mđĭ kyar bruă tuh tia mkra mjing dưi mâo hdră kñăm mdua, jing mđĭ boh tŭ yuôm mnơ̆ng dhơ̆ng lehanăn ăt rơ̆ng kjăp klei êđăp ênang. Bruă hluê ngă hdră čuăl mkă ba jao lăn, phăn dliê brei hưn klă hdră ngă bruă srăng ba yua. Hŏng ênhă lăn ti dŭm čar krĭng knông lăn ară anei tơdah drei dưi msir mghaih klei kơ knơ̆ng kdơ̆ng êa lehanăn tui duah boh ƀom, boh min snăn drei srăng dưi čuăl mkă lehanăn msir mghaih klei kơ lăn pla mjing, kơ bruă ênoh mnuih, mnuih mă bruă ti krĭng knông lăn anei kñăm mjing krĭng mnuih ƀuôn sang dôk krĭng knông lăn lehanăn anei ăt jing sa hdră čiăng răng mgang lăn čar.

Ayŏng Phạm Văn Dương mâo mă Hră pah mni mơ̆ng Êpul hgŭm phung mă bruă Việt Nam

            Hur har hlăm bruă đoàn, jih ai tiê hŏng bruă phŭn mơ̆ng pô, dŭm thŭn êgao, ayŏng Phạm Văn Dương mâo mă lu hră pah mni mơ̆ng čar lehanăn gưl dlông. Thŭn 2017, Phạm Văn Dương mâo leh Khua sang hră ksiêm hriăm kơ bruă kđi čar ala čar Hồ Chí Minh mđup brei Hră pah mni jing Nao mtô klei hriăm Toán êdah kdlưn êdi kluôm ala. Thŭn 2019, ñu mâo mă klei pah mni mơ̆ng Knơ̆ng bruă mnuih ngă bruă Việt Nam kơ boh tŭ êdah kdlưn hlăm hdră mă bruă hŏng klei mĭn mrâo. Ñu jing 1 hlăm 2 čô knuă druh Đoàn dưi bi mni mâo mă klei pah mni Lý Tự Trọng thŭn 2021. Lač kơ nai mtô mda asei Phạm Văn Dương, Nai prŏng Đỗ Văn Dương, Khua sang hră ksiêm hriăm kơ bruă kđi čar čar Daklak brei thâo:

“Phạm Văn Dương jing sa čô knuă druh bruă Đoàn mda asei êdah kdlưn, hur har, jih ai tiê kơ bruă. Hmei čih yap jih klei anăn, ƀuh ñu mâo lu klei đru mguôp hlăm bruă ksiêm duah, mtô bi hriăm kơ dŭm hdră mă bruă mơ̆ng sang hră, bruă Đoàn sang hră ăt msĕ mơh bruă đoàn gưl dlông. Păt čiăng grăp thŭn, Phạm Văn Dương nao hgŭm s’aĭ hlăm bruă đoàn mơ̆ng gưl dlông lehanăn mơ̆ng dŭm êpul êya, anôk bruă mtrŭt mjhar ñu nao hgŭm s’aĭ.

            Phạm Văn Dương lač, ñu ƀuh m’ak êdi lehanăn bŏ hŏng klei ktưn hưn hlăk mâo klei sa ai lehanăn mjing klei găl mơ̆ng êpul êya, anôk bruă, hŏng klei đru mơ̆ng ƀĭng găp, mah jiăng mă bruă mbĭt. Anăn srăng jing boh kdrŭt čiăng kơ ñu lŏ dơ̆ng mđĭ lar klei thâo mơ̆ng pô, nao hgŭm lehanăn lŏ myơr lu hĭn dơ̆ng kơ bruă đoàn ăt msĕ mơh srăng gĭr ktưn hĭn čiăng ngă jăk bruă phŭn mơ̆ng pô./.

Pô mblang: H’Nêč Êñuôl