VOV4.Êđê - Hrue 31/3, anôk bruă mdrao mgŭn kdriêk Ia Grai, čar Gialai ngă leh klei bi ktlah hŏng sa čô êkei tlĕ đuĕ mơ̆ng anôk bi ktlah ti čar Lạng Sơn wĭt kơ alŭ wăl. Tui si klei hưn mơ̆ng anôk ksiêm dlăng klei ruă čar Gialai, hrue 14/3, êkei hlăk ai anăn jing Nguyễn Công Giá kkiêng thŭn 2000, dôk ti alŭ Văn Yên, sa Ia Yok, kdriêk Ia Grai, mâo bi ktlah leh ti anôk bruă lĭng kahan Chi Lăng, čar Lạng Sơn. Ti anei mkă dlăng ñu gưl tal êlâo, mâo boh tŭ dưn jing amâo mâo kman ôh. Truh mlam hrue 23/3, khădah ka jih ôh wưng bi kčah ngă klei bi ktlah djŏ hŏng mta mtrŭn, ƀiădah ñu tlĕ đuĕ mơ̆ng anôk bi ktlah, lehanăn đĭ êdeh mdiăng tue mơ̆ng Lạng Sơn nao truh kơ kdrŭn êdeh Mỹ Đình Hà Nội, dôk ti Hà Nội mâo dua hrue lehanăn duah êdeh wĭt kơ Gialai. Anôk bruă mdrao mgŭn kdriêk Ia grai iêu ñu ngă klei bi ktlah, lehanăn lŏ hưn hŏng anôk bruă ksiêm dlăng klei ruă čar Gialai pioh lŏ mkă dlăng kman./.

Y Khem pô mblang