VOV4.Êđê - Hlăm klei blŭ hrăm hŏng khua lăn čar Nguyễn Xuân Phúc hŏng đĭng blŭ tlam hruê 11/5, khua knŭk kna Nhật Bản Suga Yoshihide bi ala kơ knŭk kna leh anăn mnuih ƀuôn sang ala čar Nhật Bản mâo klei blŭ hơêč hmưi kơ khua lăn čar Nguyễn Xuân Phúc dưi mâo klei Quốc Hội đăo knang čuăn ruah jing pô djă akŏ lăn čar Việt Nam, mbĭt hŏng anăn lŏ bi mklă Nhật Bản dlăng yuôm bhăn leh anăn lŏ dơ̆ng bi mguôp, hur har hlăm klei đru kơ ala čar Việt Nam dưi mđĭ kyar ala čar. Ăt hlăm klei anăn, knŭk kna Nhật Bản bi mklă srăng đru kơ ala čar Việt Nam kdrăp pioh bi êăt vaccine hŏng ênoh prăk 200 êklăk prăk Yên, mbĭt hŏng anăn lŏ brei sa boh hô̆ pui tui duah klei kreh knhâo hlăm êa ksĭ leh anăn srăng pŏk băng sang anôk bi ala kơ knŭk kna Nhật Bản ti ƀuôn prŏng Đà Nẵng hlăm thŭn êdei. Khua lăn čar mñă, hlăm klei mkŏ mkra hdră êlan mjĕ mgiăm hŏng ala čar Nhật Bản hlăm klei bi kƀĭn Đảng tal 13, Việt Nam yap ala čar Nhật Bản jing ala čar bi mguôp yuôm bhăn êdi leh anăn kjăp nanao. Ăt ƀri wưng anei, Khua lăn čar mâo klei iêu jak mtao leh anăn mô̆ mtao Nhật Bản srăng hriê čuă ala čar Việt Nam.

H Zawut pô mblang