VOV4.Êđê - Tlam mbruê 5-4, Khua knŭk kna Phạm Minh Chính ngă leh klei bhiăn ƀuăn rŏng ti gŭ hla čhiăm gru ala čar, ti anăp Quốc hôị leh anăn mnuih ƀuôn sang, phung bi ala kơ mnuih ƀuôn sang kluôm ala. Êlâo anăn, hŏng lu ênoh hră tŭ ư, Quốc hội bi tŭ Hdră mtrŭn ruah Phạm Minh Chính ngă Khua Knŭk kna ala čar yang ƀuôn ngă phŭn Việt Nam.

Blŭ hrăm hlăm đĭ păn bruă leh ƀuăn rơ̆ng, Khua Knŭk kna Phạm Minh Chính ƀuăn srăng ngă jih ai tiê, hgao klei dleh dlan, lông dlăng, lŏ čuê, mđĭ lar knhuah gru leh anăn klei thâo yuôm bhăn mơ̆ng phung Khua Knŭk kna dŭm gưl ênuk, gĭr mbĭt hŏng phung khua hlăm Knŭk kna bi mguôp, kpă knuah, ngă bruă jih ai tiê, tŭ dưn kơ ala čar, kơ mnuih ƀuôn sang, jih jang kyua klei tŭ mơ̆ng Đảng, mơ̆ng ala čar, djuê ana. Knŭk kna leh anăn Khua knŭk kna wưng anei srăng lŏ dơ̆ng krŭ wĭt ai tiê mlih mrâo, mbruă, klei mĭn gĭr ktưn kpưn đĭ leh anăn mâo lu klei tŭ dưn yuôm bhăn, kluôm ênŭm hlăm jih jang bruă.

H’Zawut pô mblang