VOV4.Êđê - Hrue mnuih mă bruă tar lăn ala 1/5 kčưm mâo mơ̆ng ƀuôn prŏng tuh tia prŏng ti Chicago, ala čar Mi. Anăn jing thŭn 1886, ti ƀuôn prŏng tuh tia prŏng Chicago, mâo klei bi kƀĭn prŏng Êpul hgŭm mnuih ngă bruă Mi bi klă hdră mtrŭn lač klă: “Mơ̆ng hrue 1/51886, hrue ngă bruă mơ̆ng jih jang mnuih mă bruă srăng jing 8h”. Mâo hĕ klei ruah hrue 1/5 jing hrue anei, jing klei kuôl kă mrâo plah wah mnuih mă bruă hŏng pô kiă kriê bruă dưi bi klă. Phung khua bruă dưi thâo leh êlâo klei bi klă anei mơ̆ng mnuih mă bruă, lehanăn amâo lŏ mâo êlan dưi hngah ôh. Siămdah, hrue 1/5/1886, kyua klei mnuih mă bruă čiăng amâo mâo dưi bi sĭt ôh hŏng klei djăp ênŭm, snăn mnuih mă bruă tar ala čar Mi nao hlăm bruă bi kdơ̆ng hŏng klei mdei bruă, kñăm čiăng mâo klei kpĭ phung khua bruă tŭ ư hŏng klei pô čiăng. Tal êlâo jing klei bi kdơ̆ng hŏng klei mdei mă bruă ti ƀuôn prŏng Chicago. Hlăm brô 40 êbâo čô mnuih mă bruă amâo lŏ truh kơ anôk mă bruă ôh. Diñu mkŏ mjing mittiñ, ngă lagreo hlăm ƀuôn prŏng hŏng boh hră “Mơ̆ng hrue anei jih jang mnuih mă bruă knŏng mă bruă hlăm 8h/hrue! Bi ngă bruă hlăm 8h, 8h mdei, 8 h hlăp mbul!” klei tăng blah anei hlŏng ktuang ba mâo lu mnuih nao mbĭt./.

Hruê 1/5 dưi dlăng jing hruê mơak klei tŭ jing dưi mâo, lač kơ klei gĭr bi leh bruă klam mrâo leh anăn bi êdah ai tiê bi hgŭm hŏng phung mă bruă dŭm ala čar mkăn. Hruê 1/5 ăt jing hruê bi mni kơ êpul mă bruă, bi kdơ̆ng, sua mă klei êngiê, êđăp ênang, yang ƀuôn đĭ kyar. Hruê anei, Hruê phung mă bruă dlông rŏng lăn 1/5 jing hruê mơak mơ̆ng phung mă bruă leh anăn mnuih mă bruă ala čar drei, hruê bi hgŭm êpul mă bruă dlông rŏng lăn leh ăñ dŭm djuê ana arăng ap gư̆ ktŭ juă hlăm klei bi kdơ̆ng kyua klei êđăp ênang, êngiê djuê ana leh anăn yang ƀuôn đĭ kyar.

Y Khem – H Zawut pô mblang