VOV4.Êđê- Aguah 9/4/2021, ti Anôk bruă Đảng gưl dlông, phŭn bruă kđi čar mâo leh klei bi kƀĭn ti gŭ klei gĭt gai mơ̆ng khua gĭt gai Đảng Nguyễn Phú Trọng čiăng bi trông kơ dŭm mta bruă lehanăn boh tŭ dưn hlăm klei gĭt gai, ktrâo bruă 3 mlan tal I/2021 lehanăn dŭm bruă klam kñăm hlăm wưng ti anăp. Phŭn bruă kđi čar mâo leh klei bi mklă, êpul bruă Đảng gưl dlông, phŭn bruă kđi čar, êpul bruă Đảng, Quốc Hội, khua lăn čar, knŭk kna, dŭm gưl, dhar bruă mâo leh klei gĭt gai, tă êlan mâo boh tŭ dưn, mkŏ mjing jăk siam klei kbĭn ala XIII mơ̆ng Đảng lehanăn ngă djŏ dŭm bruă klam yuôm bhăn hlăm bruă rŭ mdơ̆ng Đảng lehanăn kdrăp kđi čar, mđĭ kyar bruă duh mkra - ala ƀuôn, bruă lĭng kahan, klei êđăp ênang, bruă hŏng tač êngao. Hlăm hruê mmông ti anăp, dŭm gưl, knơ̆ng bruă srăng lŏ mđĭ dŭm klei dưi mâo leh, dưi hmar mgaih msir dŭm klei dleh dlan, klei ka djŏ, lŏ dơ̆ng ngă djŏ dŭm hdră mtrŭn ti klei bi kƀĭn tal XIII mơ̆ng Đảng lehanăn gĭr ngă jih dŭm klei kñăm, bruă klam hlăm thŭn 2021. Hlăm anăn čiăng kñăm hlăm dŭm bruă mđing truh kơ klei plĕ hră ruah khua Quốc Hội lehanăn HĐND dŭm gưl hlăm wưng thŭn 2021-2026.

Pô mblang: Y-Khem Niê