VOV4.Êđê - Ti să Yên Bài, kdriêk Ba Vì, ƀuôn prŏng Hà Nội, Phŭn bruă lĭng kahan mrâo mkŏ mjing knăm pŏk ngă mđing kơ Hdră pla 1 êklai phŭn ana kyâo mtah - “Kyua sa Việt Nam mtah”. 

Bi ala kơ bruă Đảng êpul kahan gưl dlông, Phŭn bruă lĭng kahan, Thượng tướng Phan Văn Giang mtă kơ dŭm anôk bruă lĭng kahan lŏ dơ̆ng ngă jăk hĭn bruă hâo hưn mtô mblang, bi hriăm sang hră, ktuê dlăng, ngă Asăp mtrŭn mơ̆ng  Khua knŭk kna leh anăn Asăp mtrŭn mơ̆ng  Khua phŭn bruă lĭng kahan, mđĭ klei thâo săng kơ grăp čô knuă druh, lĭng kahan, mnuih mă bruă răng mgang ala čar kơ klei tŭ prŏng prĭn leh anăn ênoh yuôm mơ̆ng bruă ana kyâo, pla dliê, răng mgang dliê, mjing hdră pla ana kyâo lar ƀar hlăm êpul lĭng kahan, đru răng mgang wăl hdĭp mda, bi hrŏ klei hmaĭ mơ̆ng klei bi mlih yan adiê. Mtă kơ dŭm anôk bruă hlăm êpul lĭng kahan mjêč pŏk ngă hdră kčah pla ana kyâo, pla dliê hluê si hdră kčah 5 thŭn 2021-2025.

H Zawut pô mblang