VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19 hlăk ala čar ƀĭng găp Campuchia dôk mâo ênoh mnuih ruă Covid 19 đĭ prăl, čar Mondulkiri, krĭng siă knông hŏng 2 kdriêk Êa Sup lehanăn Ƀuôn Đon mơ̆ng čar Dak Lak ăt mâo mnuih djŏ Covid 19, hŏng ai tiê amâo lui klei ruă anei bluh mâo lehanăn đĭ lar ti krĭng knông lăn, dŭm kđông kahan răng mgang knông lăn ti alŭ wăl čar Dak Lak krơ̆ng kjăp 100% anôk gak răng lehanăn ênoh mnuih ngă bruă hiu ksiêm dlăng, suang dlăng ti krĭng knông lăn. Mbĭt anăn, mđĭ hĭn ênoh êpul, kdrăp mnơ̆ng ti alŭ wăl phŭn, dleh ksiêm dlăng čiăng pral hmao ƀuh, gang mkhư̆ klei tlĕ găn knông lăn soh hdră bhiăn.

 Jing mnuih ngă bruă hiu duah leh anăn hmao gang mkhư̆ 12 čô găn knông lăn soh hŏng hdră bhiăn mơ̆ng Campuchia hlăm knông lăn ti kdriêk Ea Sup mlam 25/4 mrâo êgao, Trung úy Cao Tiến Dũng, dôk ngă bruă ti kđông gang mkhư̆ klei ruă Covid-19 mơ̆ng kđông răng mgang knông lăn Ia Rve brei thâo:

“Mơ̆ng bruă kăp răng thâo ƀuh klei bi knăl snăn hmei tui duah leh anăn ƀuh phung dôk nao mŭt hlăm ala čar, hmei hưn bi hgŭm hŏng dŭm êpul ti să čiăng gang mkhư̆ leh anăn mă bruă hmao bi ktlah hjăn. Tơdah knông lăn mâo êlan huâng mâo mnuih mŭt hmaĭ kjham anăn hmei mđĭ klei thâo gak răng, mđĭ bruă klam lu hĭn, gang mkhư̆ klei ruă tưp msĕ si bi kdơ̆ng hŏng phung roh.”

 Lĭng kahan răng mgang knông lăn gak ti kđông gang mkhư̆ klei ruă tưp Covid-19 ti ƀăng jang knông lăn Đăk Ruê

Hluê si Đại úy Hoàng Văn Tuân,  K’iăng khua kđông răng mgang knông lăn Ia Rvê, mơ̆ng hruê 25/4 truh ară anei, hlăm dŭm ktuê knông lăn kdriêk Ea Sup, êpul lĭng kahan răng mgang knông lăn bi hgŭm leh hŏng dŭm êpul bruă djŏ tuôm hmao thâo ƀuh leh anăn gang mkhư̆ 3 klei hŏng 17 čô găn knông lăn soh hdră bhiăn. Bi mklă hlăm wưng kơ anăp, klei anei srăng lŏ dơ̆ng mâo, anăn anôk bruă mđĭ ai ayŏng adei hgao klei dleh dlan, gun kpăk kơ yan adiê, lăn čư̆ čiăng ngă jăk bruă klam pô hŏng klei gĭr jih ai tiê rơ̆ng êđăp ênang, hơĭt kjăp ti knông lăn:

“Êpul kahan alŭ wăl ƀiă, bi phung khăng mŭt êngao mmông mă bruă leh anăn klei găl yan adiê, čư̆ êa, bruă knuă snăn hlăm yan không, êlan klông dap, lăn khăng, mnuih ƀuôn sang mjhua hŏng klei anăn mŭt hlăm ala čar, amâo djŏ êlan klă klơ̆ng ôh, ƀiă dah hlăm ktuê knông lăn. Ti anăp klei dleh dlan anăn, Anôk bruă gĭt gai mbha leh êpul gak răng ti knông lăn leh anăn bi mlih gak răng mbha êpul mă bruă ti ktuê knông lăn čiăng ktuê dlăng jăk hĭn.”

Bi ti kđông gang mkhư̆ klei ruă Covid-19 ti kđông kahan răng mgang ƀăng jang knông lăn Đăk Ruê, bruă ksiêm dlăng ăt mâo anôk bruă kƀĭn jih hnơ̆ng, Trung tá Phùng Văn Bình, knuă druh aê mdrao kahan răng mgang knông lăn Đăk Ruê brei thâo:

“Ayŏng adei ti nei hiu ksiêm dlăng knông lăn gang mkhư̆ klei ruă tưp. Tơdah mâo phung găn knông lăn soh hdră bhiăn snăn ayŏng adei hiu ksiêm dlăng ba ti anôk bi ktlah hjăn ti anôk bruă. Ayŏng adei ti kđông ti nei leh anăn ayŏng adei hlăm anôk bruă hŏng ai tiê gang mkhư̆ klei ruă tưp, amâo brei klei ruă tưp mŭt hlăm alŭ wăl knông lăn.”

 Gak răng ti kđông Ia Rve

Thượng tá Nguyễn Minh Tuyên, K’iăng khua gĭt gai Êpul kahan răng mgang knông lăn čar Dak Lak, brei thâo: Hlăm kluôm ktuê knông lăn dlông êbeh 73 km bi knông hŏng čar Mondulkiri, Ala mtao Campuchia, dŭm kđông răng mgang knông lăn hyuă kjăp bruă ksiêm dlăng, jih ai tiê gang mkhư̆ bruă mŭt hlăm ala čar soh hŏng hdră bhiăn. Mbĭt hŏng anăn, dŭm anôk bruă lŏ dơ̆ng bi hgŭm tliêr kjăp hŏng gưl bruă Đảng, bruă sang čư̆ êa alŭ wăl, boh nik ti 4 să knông lăn hlăm dŭm kdriêk Ea Sup leh anăn Ƀuôn Đon, mđĭ ktang bruă hâo hưn, mđĭ klei thâo săng, klei thâo, hdră gang mkhư̆ klei ruă Covid-19 kơ mnuih ƀuôn sang.

“Anôk bruă pŏk ngă mđĭ lar 6 anôk ngă bruă sa anôk, 18 êpul ksiêm dlăng pral mđĭ ktang kdrăp mnơ̆ng, mđĭ ai knuă druh kdiêm dlăng jih hruê mlam rơ̆ng kriê kjăp knông lăn hŏng klei gĭr amâo brei hlei pô mơ̆ng Campuchia găn knông lăn soh hŏng hdră bhiăn.”

Hgao klei dleh dlan, suăĭ êmăn ti knông lăn dleh dlan, grăp čô knuă druh, lĭng kahan răng mgang knông lăn Dak Lak mâo klei thâo săng amâo brei ôh klei ruă tưp Covid-19 mŭt hlăm alŭ wăl.

Pô mblang: H’Zawut Ƀuôn Yă