VOV4.Êđê- Hlăm ênuk ară anei, phung mniê amâo djŏ knŏng klam bruă hlăm pưk sang đuič ôh ƀiădah diñu lŏ jih ai tiê nao hgŭm dŭm bruă hlăm yang ƀuôn. Kyua anăn, čiăng krơ̆ng kjăp klei yâo m’ak kơ gŏ sang, phung mniê bi hluê ngă jăk dua bruă klam wăt hlăm gŏ sang lehanăn yang ƀuôn, bi hgŭm lehanăn krŭ wĭt klei thâo bi đru, bi čung ba mơ̆ng grăp čô mnuih hlăm gŏ sang.

Jing khua sa anôk bruă mjuăt bi hriăm klei thâo hdĭp kơ hđeh điêt, ti ƀuôn prŏng Ƀuôn Ama Thuôt, čar Dak Lak, ƀiădah bruă mơ̆ng amai Dương Thị Thu Hiền amâo knŏng ngă ti ƀuôn prŏng đuič ôh ƀiădah kluôm čar Dak Lak, boh nik mâo dŭm bruă ngă ti lu čar, ƀuôn prŏng hlăm kluôm ala. Jih dua ung mô̆ khăng nao mă bruă kbưi sui hruê, anăn ung mô̆ khăng mâo lu klei amâo thâo djŏ. Amai Dương Thị Thu Hiền brei thâo, čiăng bi knar bruă mă leh anăn gŏ sang, 2 ung mô̆ hdơ̆ng bi mđĭ klei thâo săng, klei khăp leh anăn klei bi đru:

Bruă phung êkei thâo săng bruă klam mơ̆ng phung mniê, thâo săng leh anăn đru kơ dŭm bruă hlăm gŏ sang jing bŏ hŏng yuôm bhăn. Bruă hlăm gŏ sang jing bruă mbĭt. Leh anăn dưi thâo săng klei anăn jing sa čô êkei brei thâo săng mô̆ pô leh anăn mô̆ thâo săng kơ ung pô si ngă čiăng bi đru. Leh anăn čiăng đru brei bi dôk yăl dliê leh năn klă sĭt bi êdah klei hdơr knga leh anăn bi khăp pô jing mô̆, ung pô dih hŏng klei khăp kơ gŏ sang pô. Hŏng hdră anei snăn kâo pô ăt dưi bi knar klei hơ̆k mơak hlăm gŏ sang pô.”

Ngă lu bruă hlăm yang ƀuôn ƀiădah amai Lưu Thị Thu Hiền ăt pioh lu mmông kơ gŏ sang, mbĭt hŏng phung anak hlăp lêñ

Hluê si chị Lưu Thị Thu Hiền, sa čô ngă bruă mnia blei ti Dak Lak snăn čiăng mđĭ klei jăk mơak hlăm gŏ sang, phung mniê khă gơ̆ kpăk lu bruă ăt brei bi êdah klei khăp pô hŏng dŭm bruă ngă klă klơ̆ng. Kyua anăn, khă gơ̆ gĭt gai sa blư̆ 2 knơ̆ng bruă, ƀiădah ƀiă êdi grăp hruê kăp dŭm blư̆, amai ăt čŏng pô tŭk knă kơ ung, kơ anak huă ƀơ̆ng. Grăp hruê, jih gŏ sang huă yang hruê, knhal jih hruê kăm ƀơ̆ng aguah, bi blŭ hrăm, tăm mâo klei snăn bi yăl dliê, bi tăng mgăl… jing dŭm bruă đru kơ klei jăk mơak hlăm gŏ sang dưi hơĭt kjăp.

Ung kâo ăt lač kâo mâo sa ƀĕ kngan mtâo čiăng dưi ktŭng ung kâo leh anăn phung anak đru ngă bruă hlăm pưk sang hŏng kâo. Khăsnăn, boh sĭt snăn kâo ăt ngă sa wưng pioh kơ ung leh anăn phung anak thâo hdĭp hŏng gru hmô kâo mjing leh, anăn jing dlăng myuôm gŏ sang, mmông huă ƀơ̆ng leh anăn kâo ăt ngă nanao klei bhiăn huă 3 blư̆ sa hruê hlăm gŏ sang.

Amai Dương Thị Thu Hiền brei thâo, čiăng bi knar bruă knuă leh anăn gŏ sang, 2 ung mô̆ mđĭ klei thâo săng, klei khăp leh anăn klei bi yăl dliê

     Hluê si Nai prĭn thơ̆ng mdrao hlăm klei mĭn Lý Thị Mai –  Khua anôk bruă mdrao hlăm klei mĭn hdră mrâo mrang ƀuôn prŏng Hồ Chí Minh, hlăm klei hdĭp mrâo mrang, phung mniê ƀrư̆ bi êdah bruă klam leh anăn bi mklă bruă klam pô hlăm lu mta bruă mơ̆ng klei hdĭp yang ƀuôn. Khă snăn, amâo dưi hngah ôh bruă klam digơ̆ hlăm gŏ sang bŏ hŏng yuôm bhăn. Phung mniê jing phŭn, jing phung krơ̆ng čiăng mđĭ klei yâo mơak hlăm gŏ sang, bi hgŭm mnuih hlăm gŏ sang. Anăn jing bruă klam digơ̆ hluê ngă. Hlăm djăp gŏ sang, čiăng dưi ngă jih bruă klam hŏng gŏ sang leh anăn tui tiŏ bruă knuă, phung mniê gĭr ktưn lu snăk. Mbĭt anăn, digơ̆ bi knar leh anăn mbha jih 2 bruă klam anăn. Čiăng dưi ngă klei anei, êlâo hĭn phung mniê brei mâo klei thâo hră mơar leh anăn dŭm klei thâo bi blŭ tlao nao hriê hŏng grăp cô mnuih.

Drei brei mâo klei bi knar, jing drei nao mă bruă ti anôk bruă snăn ăt mâo phung mă bruă mbĭt, mâo phung khua kăp đru kơ pô, jing phung nah gŭ bi hgŭm hŏng pô. Anăn ăt jing sa êpul brei drei mâo klei thâo bi blŭ hrăm čiăng pô dưi hgŭm hŏng êpul anei, mâo wăt phung ti gŭ pô đru pô. Anăn jing sa êpul brei drei thâo blŭ tlao čiăng mâo klei bi đru, bi klam hŏng pô kơ bruă yang ƀuôn. Kơ gŏ sang čiăng dưi bi knar snăn drei amâo dưi ngă ôh hjăn păn, brei mâo klei bi hgŭm mơ̆ng ung, anak, boh nik mơ̆ng phung mkăn hlăm gŏ sang, mđĭ lar klei dưi bi hgŭm phung hlăm gŏ sang.

Amâo djŏ knŏng ngă hlăm bruă kriê dlăng pưk sang, tŭk knă đuič ôh, phung mniê ênuk mrâo mrang ngă bruă hlăm yang ƀuôn, găn lu klei gun kpăk leh anăn klei kpĭ čiăng bi mklă bruă klam pô. Čiăng mjing klei găl kơ phung mniê dưi mđĭ lar klei thâo pô hlăm bruă mđĭ kyar bruă knuă leh anăn mkŏ mjing gŏ sang jăk mơak, brei mâo klei đru mơ̆ng phung hlăm gŏ sang. Snăn kơh phung mniê dưi ngă bruă klam jing mô̆, jing amĭ, ăt bi leh bruă mkăn hlăm klei hdĭp ala ƀuôn.

Pô mblang: H’Zawut Ƀuôn Yă