VOV4.Êđê - Ti Hà Nội, Êpul bruă răng mgang klei êđăp ênang kơ hdră ruah phung bi ala Quốc hội gưl 15 lehanăn bi ala Hội đồng nhân dân dŭm gưl wưng thŭn 2021 – 2026 mkŏ mjing leh Klei bi kƀĭn tal 3 čiăng ksiêm wĭt, tĭng dlăng kluôm dŭm hdră leh pŏk ngă mbĭt anăn bi tŭ ư kơ dŭm hdră êlan, bruă klam phŭn hlăm wưng ti anăp. Trung tướng Lương Tam Quang, K’iăng khua phŭn bruă kahan ksiêm, Khua êpul bruă gĭt gai klei bi kƀĭn. Hluê si klei hưn mơ̆ng Êpul bruă, truh ară anei, hdră mprăp kñăm rơ̆ng kjăp klei êđăp ênang kơ hdră ruah pô bi ala Quốc hội gưl 15 lehanăn Hội đồng nhân dân dŭm gưl, wưng thŭn 2021 – 2026 dưi ngă djŏ si klei kčah mtrŭn. Ti anôk bi kƀĭn, phung bi ala ăt bi mklă dŭm klei dleh dlan, gun kpăk lehanăn bi trông kơ dŭm hdră msir, bruă klam phŭn hlăm wưng ti anăp, đru hluê ngă bruă djŏ hŏng klei dôk mâo, gĭr răng mgang kjăp klei êđăp ênang ala ƀuôn hlăm kluôm ala, mjing tur knơ̆ng kjăp kơ hdră mkŏ mjing klei ruah khua djŏ hŏng mta kñăm mâo kčah mtrŭn./.

H’Nêč pô mblang