VOV4.Êđê - Hlăm 4 mlan akŏ thŭn, prăk ba čhĭ kơ ala tač êngao mơ̆ng čar Gia Lai krŭ wĭt jăk hŏng hnơ̆ng đĭ giăm 48% mkă hŏng wưng anei thŭn 2020. Kyua anăn, năng ai srăng dưi bi leh hdră kñăm 610 êklăk USD hlăm thŭn 2021. Ară anei, mnơ̆ng dhơ̆ng ba čhĭ kơ ala tač êngao phŭn mơ̆ng čar ăt jing kphê, ksu, tiu, djam tam boh kroh… Dŭm mta mnơ̆ng anei dưi ba čhĭ leh hlăm giăm 40 ala čar. Boh nik, dŭm mta mnơ̆ng dhơ̆ng dưi ngă djŏ hnơ̆ng čuăn mơ̆ng anôk ba čhĭ msĕ si: Mi, EU, Nhật Bản. Kdlưn êdi jing kphê hŏng prăk ba čhĭ kơ ala tač êngao kah knar êbeh 3 êtuh êklăk USD/thŭn. Kluôm čar mâo hlăm brô 30 anôk bruă mnia ba čhĭ kơ ala tač êngao, hlăm anăn mâo 11 anôk bruă mnia blei ba čhĭ boh mnga lŏ hma. Ară anei ênoh prăk ba čhĭ kơ ala tač êngao mơ̆ng boh mnga lŏ hma mâo hlăm brô 80%. Khua gĭt gai Knơ̆ng bruă tuh tia mkra mjing Gia Lai mrâo mă bruă hŏng dŭm anôk bruă mnia blei čiăng ktuê dlăng boh klei ba čhĭ kơ ala tač êngao kñăm hmao thâo klei dleh dlan, êdu kƀah hlăm bruă hluê ngă klei bhiăn, hdră êlan Knŭk kna hŏng bruă ba čhĭ mnơ̆ng kơ ala tač êngao.

H Zawut pô mblang