VOV4.Êđê -  Ăt hlăm hruê 1/4, Quốc hội bi trông leh ti Sang bi kƀĭn prŏng kơ Klei hưn mdah hdră mă bruă wưng thŭn 2016 – 2021 mŏng Anôk bruă mkă tĭng knŭk kna; bi trông kơ klei kčah mtrŭn ênoh phung bi ala thơ̆ng kơ bruă mŏng Hội đồng nhân dân ƀuôn prŏng Hà Nội wưng thŭn 2021 – 2026. Klei hưn mdah kơ hdră mă bruă mŏng Anôk bruă mkă tĭng ngăn prăk knŭk kna wưng thŭn 2016 – 2021 brei ƀuh, bruă mkă tĭng ngăn prăk knŭk kna hluê ngă leh hdră ksiêm dlăng hŏng dŭm boh tŭ êdah kdlưn, đru mguôp yuôm bhăn hlăm bruă bi leh klei bhiăn; bi kdơ̆ng hŏng klei ƀơ̆ng ngăn, klei bi liê ti mang lehanăn hyuă kjăp bruă hluê ngă hdră bhiăn, mđĭ hdră kriê dlăng mŏng knŭk kna, ba yua ngăn prăk, ngăn drăp knŭk kna. Klă klơ̆ng, hlăm wưng păn bruă, anôk bruă mkă tĭng ngăn prăk knŭk kna akâo msir mghaih bruă ngăn prăk mâo êbeh 353 êbâo 700 êklai prăk, ba jao 20 boh klei mâo klei bi knăl bruă ngă soh jhat kơ Anôk bruă kahan ksiêm ksiêm dlăng kñăm bi mklă lehanăn msir mghaih djŏ si klei kčah mtrŭn mŏng hdră bhiăn. Kơ boh tŭ hluê ngă bruă mkă tĭng ngăn prăk, wưng thŭn 2016-2021, ênoh hưn mdah brei msir mghaih bruă ngăn prăk mŏng Anôk bruă mkă tĭng ngăn prăk knŭk kna mâo leh êpul êya bruă hluê ngă êbeh 237 êbâo 500 êklai prăk, mâo 73,6% ênoh klei hưn mdah, lu hră m’ar mâo leh Knŭk kna, dŭm phŭn, dhar bruă lehanăn alŭ wăl hluê ngă, mkra mlih, lăm lui, thiăm mbŏ hluê si klei ba mdah mơ̆ng Anôk bruă ksiêm tĭng knŭk kna./.

H Nêč pô mblang