VOV4.Êđê - Lŏ dơ̆ng klei bi kƀĭn tal 11, Quốc hội gưl 14, tlam 31/3, ti gŭ klei gĭt gai mơ̆ng Khua Quốc hội mrâo Vương Đình Huệ, Quốc hội bi mklă Hdră mtrŭn brei mdei bruă 3 čô k’iăng Khua Quốc hội. Hŏng lu hră mplĕ, Quốc hội bi mklă Hdră mtrŭn brei mdei 3 čô k’iăng Khua Quốc hội. Quốc hội bi mklă: Brei mdei bruă K’iăng Khua Quốc hội gưl 14 hŏng Aduôn Tòng Thị Phóng, Uông Chu Lưu leh anăn Phùng Quốc Hiển. Hdră mtrŭn anei mâo klei dưi dưn hluê ngă yap mơ̆ng leh mâo Quốc hội bi mklă. Leh kơ năn, Dhar bruă Quốc hội hưn mdah anăn mgơ̆ng asei čiăng Quốc hôị ruah phung K’iăng Khua Quốc hôị leh anăn bi trông hlăm Êpul kơ hdră mĭn tĭng mnuih mă bruă čiăng ruah phung K’iăng Khua Quốc hôị. Hruê anei, Dhar bruă Quốc hội hưn mdah Quốc hội klei tŭ bi trông hlăm Êpul leh anăn hlak mblang, mă klei blŭ mguôp mơ̆ng phung bi ala Quốc hôị kơ hdră mĭn tĭng mnuih mă bruă čiăng ruah phung K’iăng Khua Quốc hội. Quốc hội ruah phung K’iăng Khua Quốc hôị hŏng hdră mplĕ hră hgăm. Leh kơ anăn Quốc hôị bi trông hlăm anôk bi kƀĭn kơ klei hưn mdah bruă klam wưng thŭn 2016-2021 mơ̆ng Knơ̆ng bruă ksiêm yap knŭk kna.

H Zawut pô mblang