VOV4.Êđê-  Lŏ dơ̆ng hdră mă bruă, hruê anei, hruê 30/3, Dhar bruă gĭt gai Quốc hội hưn mdah hŏng Quốc hội brei mdei bruă hŏng Khua kiă kriê Quốc hội, Khua êpul hgŭm ruah khua ala čar. Hluê si hdră mă bruă aguah hruê 30/3, klei bi kƀĭn tal 11 Quốc hội gưl XIV bi trông leh ti Sang bi kƀĭn kơ dŭm Hră hưn mdah hdră mă bruă wưng thŭn 2016-2021 mơ̆ng Sang phat kđi yang ƀuôn gưl dlông, Knơ̆ng ksiêm dlăng yang ƀuôn gưl dlông. Tlam hruê 30/3, phung bi ala Quốc hội bi trông leh ti Êpul kơ bruă brei mdei bruă Khua kiă kriê Quốc hội, Khua êpul hgŭm ruah khua ala čar; bi mklă Hdră bhiăn gang mkhư̆, bi kdơ̆ng hŏng matuĭ mkra mlih. Dhar bruă gĭt gai Quốc hội hưn mdah leh hŏng Quốc hội kơ boh tŭ hdră bi trông ti Êpul lehanăn hlak mblang, tŭ mă klei blŭ mơ̆ng phung bi ala Quốc hội kơ klei brei mdei bruă hŏng Khua kiă kriê Quốc hội, Khua êpul hgŭm ruah khua ala čar. Quốc hội brei mdei hŏng Khua kiă kriê Quốc hội, Khua êpul hgŭm ruah khua ala čar hluê hdră mplĕ hră hgăm. Ăt hlăm tlam hruê 30/3, Quốc hội srăng bi trông ti Êpul kơ hdră bruă knuă druh čiăng ruah Khua kiă kriê Quốc hội, Khua êpul hgŭm ruah khua ala čar./.

Pô mblang: H’Nêč Êñuôl