VOV4.Êđê-  Lŏ dơ̆ng Hdră Klei bi kƀĭn tal 11, aguah 2/4, Quốc hôị bi mklă Hdră mtrŭn kơ bruă lăm lui bruă Khua knŭk kna ala čar yang ƀuôn ngă phŭn Việt Nam hŏng Nguyễn Xuân Phúc. Hdră mtrŭn mâo Quốc hội bi mklă hŏng ênoh phung bi ala Quốc hôị tŭ ư. Bi ala Quốc hôị, Khua Quốc hội Vương Đình Huệ bi mni lač jăk leh anăn mđup brei mnga kơ Nguyễn Xuân Phúc. Êlâo anăn, Khua gĭt gai Đảng, Khua lăn čar Nguyễn Phú Trọng hưn mdah ti anăp Quốc hội. Hră mơar lač klă, hlăm klei bi kƀĭn tal 1 Quốc hội gưl 14, Nguyễn Xuân Phúc mâo Quốc hội đaŏ knang ruah Khua Knŭk kna. Hlăm wưng păn bruă, Khua Knŭk kna Nguyễn Xuân Phúc bi leh bruă klam dưi jao. Dưi lač wưng 2016-2021 jing sa wưng dleh dlan, Knŭk kna gĭt gai leh ala čar Việt Nam găn leh dŭm klei dleh dlan dưi mâo klei tŭ dưn jăk siam. Ăt hlăm 2/4, Dhar bruă Quốc hội hưn mdah hŏng Quốc hội brei mdei bruă Khua lăn čar, phung bi ala mplĕ hră hgăm leh anăn hmư̆ Dhar bruă gĭt gai Quốc hội hưn mdah anăn mgơ̆ng asei Quốc hội ruah khua lăn čar.

Pô mblang: H’Zawut Ƀuôn Yă