VOV4.Êđê -  Lŏ dơ̆ng hdră klei bi kƀĭn tal 11, Quốc hội gưl 14, hruê anei, Quốc hội mă bruă kơ mta phŭn mnuih mă bruă. Klă klơ̆ng hlăm aguah, Quốc hội srăng brei mdei bruă K’iăng Khua lăn čar, phung hlăm Dhar bruă Quốc hội, Khua dŭm Dhar bruă Quốc hội, Khua čih hră Quốc hội, Khua Dhar bruă ksiêm yap knŭk kna. Leh anăn Khua lăn čar srăng hưn mdah anăn mgơ̆ng asei kơ Quốc hội ruah K’iăng Khua lăn čar, Dhar bruă Quốc hội hưn mdah kơ Quốc hội ruah phung hlăm Dhar bruă Quốc hội. Phung bi ala Quốc hội srăng bi trông hlăm êpul kơ hdră mĭn tĭng mnuih mă bruă čiăng ruah K’iăng Khua lăn čar, phung hlăm Dhar bruă Quốc hội leh anăn hlăm mmông tlam srăng ruah phung anei hŏng hdră mplĕ hră hgăm. Ăt hlăm mmông tlam, Dhar bruă Quốc hội hưn mdah anăn phung mgơ̆ng asei ngă Khua dŭm Dhar bruă hlăm Quốc hội, Khua čih hră Quốc hội, Khua Dhar bruă ksiêm yap Knŭk kna.

H’Zawut pô mblang