VOV4.Êđê - Hruê anei, Klei bi kƀĭn 11 Quốc hội gưl XIV mphŭn mŭt hlăm hruê mă bruă tal 2. Hlăm klei bi kƀĭn aguah anei ti sang bi kƀĭn prŏng, phung bi ala srăng hmư̆ klei hưn mdah hdră mă bruă wưng thŭn 2016-2021 mŏng Sang phat kđi yang ƀuôn gưl dlông, Knơ̆ng ksiêm dlăng yang ƀuôn gưl dlông, Ksiêm tĭng Knŭk kna lehanăn hưn mdah klei akâo čiăng mŏng mnuih ƀuôn sang. Khua hlăm Êpul hgŭm ruah khua ala čar, Khua adŭ bruă Êpul hgŭm ruah khua ala čar Nguyễn Hạnh Phúc hưn mdah leh boh tŭ bruă pŏk ngă hdră ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026 mŏng leh mkŏ mjing Êpul hgŭm ruah khua ala čar truh kơ mlan 3/2021.

Tlam, phung bi ala bi trông ti êpul kơ Klei čih mkra hră hâo mdah hdră mă bruă wưng păn bruă gưl XIV mŏng Quốc hội, hưn mdah hdră mă bruă wưng păn bruă gưl XIV mŏng Anôk kiă kriê Quốc hội, Êpul hgŭm Djuê ân, dŭm Dhar bruă mŏng Quốc hội, dŭm klei hưn mdah hdră mă bruă wưng păn bruă 2016-2021 mŏng Khua lăn čar, Knŭk kna, Sang phat kđi yang ƀuôn gưl dlông, Knơ̆ng ksiêm dlăng yang ƀuôn gưl dlông, Ksiêm tĭng Knŭk kna./.

H’Nêč pô mblang