VOV4.Êđê -  Hruê mbruê 25-3, Bruă Đảng čar Dak Lak mkŏ mjing Klei bi kƀĭn ksiêm wĭt mkŏ mjing Đảng thŭn 2020, pŏk ngă bruă knuă thŭn 2021. Hluê si klei blŭ hlăm anôk bi kƀĭn, thŭn 2020, gưl bruă Đảng dŭm gưl čar Dak Lak gĭr kčĕ mkŏ mjing tŭ jing klei bi kƀĭn đảng dŭm gưl đru hlăm klei tŭ jing Klei bi kƀĭn Đangr tal XVII. Lu gưl bruă Đảng, anôk bruă Đảng mâo hdră ngă bruă đru hdră mtrŭn ba yua hlăm klei dhĭ. Bruă mkŏ mjing êpul bruă khuăt, ngă bruă tŭ dưn mguôp hŏng klei bi hrŏ mnuih mă bruă knŭk kna, mđĭ hnơ̆ng leh anăn lŏ mkŏ dăp êpul mă bruă knŭk kna. Thŭn 2020, Dak Lak bi hrŏ 60 čô mnuih mă bruă knŭk kna hlăm gưl dlông leh anăn êbeh 1100 čô mnuih mă bruă knŭk kna. Mĭn tĭng thŭn anei, čar Dak Lak lŏ dơ̆ng bi hrŏ 60 čô mnuih mă bruă knŭk kna hlăm gưl dlông leh anăn êbeh 1100 čô mnuih mă bruă knŭk kna, hluê si ênoh 10% mơ̆ng Hdră mtrŭn 39/2015 mơ̆ng Phŭn bruă kđi čar leh anăn hdră kčah kơ klei bi hrŏ leh anăn lŏ ba mnuih mă bruă knŭk kna tui si hdră kčah mơ̆ng Anôk dlăng bruă Đảng čar Dak Lak.

H Zawut pô mblang