VOV4.Êđê - Ƀri hlăm wưng knăm prŏng Phật đản, Phật lịch 2565, thŭn 2021 lehanăn bi hdơr 40 thŭn mkŏ mjing klei đăo Yơng Việt Nam (1981-2021), aguah 19/5, ti Hà Nội, khua bruă Đảng gưl dlông, k’iăng khua kiă kriê Quốc Hội Trần Thanh Mẫn nao čuă lehanăn mâo klei blŭ hơêč hmưi kơ khua Yơng Thích Thanh Nhiễu, k’iăng khua kiă kriê bruă klei đăo Yơng Việt Nam, mbĭt hŏng adŭ bruă 1 hlăm anôk bruă klei đăo Yơng gưl dlông Việt Nam. Bi ala kơ êpul khua gĭt gai lehanăn knŭk kna, Trần Thanh Mẫn mơĭt kơ jih jang phung kiă kriê bruă klei đăo Yơng, phung Yơng lehanăn phung đăo Yơng ti ala čar Việt Nam klei blŭ hơêč hmưi srăng mâo sa yan knăm prŏng Phật đản hŏng lu klei hơ̆k mơak lehanăn mâo nanao klei bi mguôp hlăm djuê ana. Mñă kơ klei ruă tưp Covid-19 dôk bluh lar ktang lehanăn dleh dưi ksiêm dlăng djŏ hŏng hruê mmông klei ruah khua Pô bi ala Quốc Hội gưl 15 lehanăn HĐND dŭm gưl. Trần Thanh Mẫn hmăng hmưi kơ dŭm čô kiă kriê klei đăo Yơng Việt Nam srăng mtrŭt mjhar kơ phung đăo srăng nao hgŭm hlăm bruă ruah khua mâo klei êđăp ênang, mbĭt hŏng anăn lŏ bi êdah klei hmăng hmưi kơ dŭm čô kiă kriê klei đăo Yơng jing pô mgơ̆ng asei ngă Pô bi ala Quốc Hội gưl 15 lehanăn HĐND dŭm gưl wưng thŭn 2021-2026 tơdah mâo klei dưi čuăn ruah srăng lŏ mâo boh blŭ, bi êdah klei čiăng, klei hmăng hmưi mơ̆ng mnuih ƀuôn sang truh kơ Đảng lehanăn knŭk kna.